Recepción nena saharaui na Guarda
O luns 29 de xullo o Alcalde da Guarda, Antonio Lomba, fixo unha recepción a representantes a Asociación Solidariedade Galega co Pobo Saharaui, grazas á cal «Fala», unha nena de 10 anos de idade, pode pasar este verán cunha familia de acollida na vila da Guarda.
Este colectivo leva traballando dende o ano 1992 en diversos temas humanitarios, de sensibilización política, educación, deporte, pero sen dúbida o seu proxecto estrela é «Vacacións en Paz», mediante o cal nenos e nenas saharauis de entre 7 e 13 anos teñen a posibilidade de escapar do verán do Sáhara, onde se poden alcanzar os 50º de temperatura para poder ter un respiro con familias de acollida de toda Galicia. Este ano un total de 300 nenos e nenas participan nesta experiencia, na que tamén se inclúe unha atención médica grazas a diversos convenios co Sergas e clínicas privadas.
Dende o colectivo resaltan a importancia de sensibilizar o problema do pobo saharaui, para que sexan quen de voltar á súa terra e recuperar as súas vidas nun Sáhara libre.
A Delegada de Zona da Asociación Solidariedade Galega co Pobo Saharaui quixo agradecer o apoio recibido por parte do Concello da Guarda, facendo un convite a todas aquelas familias que desexen participar no seu programa «Vacacións en Paz», para seren familias de acollida de cara ao verán 2020, indicando que poden contactar con este colectivo chamando ao teléfono 986 26 26 37.
