Seis establecementos da Guarda reciben o distintivo SICTED na Gala de Turismo Rías Baixas
O mércores 28 de febreiro tivo lugar no Auditorio Mar de Vigo a Gala de Turismo Rías Baixas, organizada pola Deputación de Pontevedra. A este acto asistíu a concelleira guardesa de Turismo, Montserrat Magallanes, así como outros responsables do sector turístico público e privado de toda a provincia.
A presidenta da Deputación de Pontevedra, Carmela Silva, comezou a súa intervención recoñecendo a profesionalidade e calidade do sector turístico. Nesta liña, compre salientar que Pontevedra é a provincia con maior número de recoñececementos ao «Compromiso de Calidade Turística», cun total de 263 entidades públicas e privadas co distintivo SICTED, promovido pola Secretaría de Estado de Turismo.
A Oficina de Turismo Municipal e as praias de Area Grande e O Muíño contan dende 2010 co distintivo SICTED, aos que agora súmanse novos establecementos hostaleiros da Guarda. Así, durante a Gala de Turismo Rías Baixas recibiron este distintivo de calidade o Hotel Convento de San Benito, o Restaurante Casa de la Abuela, o Restaurante Celtic, o Restaurante Marusía, o Restaurante Xantar e a Cafetería-Casa Aquilino. Deste xeito, A Guarda pode presumir de calidade recoñecida nos diferentes establecementos e servizos turísticos.
Na gala tamén se presentou a campaña de promoción «Somos historias», conmemorando o Ano Internacional do Patrimonio no que se apostará pola promoción dos nosos tesouros fortificados, arqueolóxicos, paisaxísticos, inmateriais, literarios, culturais, espirituais e naturais.