A Guarda recibirá da Deputación máis de seiscentos mil euros para a reforma e ampliación do pavillón da Sangriña

A Deputación confirmou, na presentación do plan de reactivación económica da provincia REACPON, a achega de 609.672,24 € para acometer a execución da reforma e ampliación do pavillón municipal da Sangriña. Un proxecto que conta cun orzamento total de 1.674.023,95 €.

REACPON, o plan de investimento público más ambicioso da historia da Deputación, mobilizará 39,1 millóns de euros para acometer grandes actuacións nos concellos da provincia e transformar o territorio, na que se financian aqueles proxectos que consigan maior puntuación segundo criterios de madurez do proxecto, contribución a unha economía descarbonizada, calidade do proxecto e consecución dos obxectivos da Axenda 2030.

Os proxectos deste plan deberán estar executados a finais de abril de 2023. Dado que o prazo de execución da obra é dun ano e o proxecto está listo para licitar o concello activará un procedemento de licitación anticipada para poder cumprir os prazos que marca a Deputación.

Para acadar a puntuación suficiente para resultar elixido pola Deputación e para poder licitarse, o proxecto do pavillón da Sangriña, aprobouse nun pleno municipal cos votos favorables do Equipo de goberno e do BNG e tivo os votos en contra do PP e de Converxencia Galega. Ao producirse un empate na votación o alcalde, Antonio Lomba, tivo que facer valer o seu voto de calidade.

Para axilizar a adxudicación o concello completará, nun primeiro momento, o financiamento con fondos propios, acudindo a remanente de tesourería e, se fora necesario, a un préstamo. A vez manterá contactos coa Xunta de Galicia para solicitar, unha vez máis, cofinanciamento para esta obra, recordándolle o compromiso de mellora do pavillón que o mesmo presidente Feijoo expresou as xogadoras e representantes do Atlético Guardés de balonmán feminino en 2017, con motivo da recepción ao club polo campionato de liga da división de Honra.

En palabras do alcalde, “Agora é momento de aproveitar a ocasión para reformar e ampliar o pavillón e conseguir a renovación total do edificio, cunhas instalacións máis modernas e acordes coa categoría do noso equipo de balonmán feminino, que disputa na Sangriña os partidos da liga na división de Honra e de competicións europeas. Esta reforma estará rematada en abril de 2023”
Os novas instalacións entre outras actuacións contemplan, unha nova fachada, unha nova bancada no fondo, a creación dunha planta superior para a circulación de espectadores e acceso seguro ás gradas, unha zona para espectadores en cadeira de rodas, catro vestiarios xerais, un vestiario accesible, un vestiario para árbitros, dous núcleos xerais de aseos, tres aseos accesibles, un area de prensa, novas zonas de paso inferiores, almacéns etc. Ademais haberá unha importante mellora na accesibilidade e na eficiencia enerxética do edificio. Teremos un pavillón como A Guarda e o Atl Guardés se merece.