O Trail do Trega logra récord de participación con 650 participantes

Esta mañá foi a presentación oficial do XII Trail do Trega no escenario que acollerá este evento este domingo 23 de novembro.

A proba transcorrerá 100% polo monte Trega, un dos lugares máis visitados da xeografía galega, onde os participantes desfrutarán dunhas paisaxes inigualables. Ademais este ano contan con récord de participación, con 650 persoas insritas.

A proba estará integrada na Pontevedra Trail League (só a distancia longa) e constará de dúas distancias: a Mini Trail 12km (+450 metros) e a Gran Trail do Trega 18km (+810 metros). A Gran Trail realizará a súa saída ás 10:00h, e unha hora máis tarde farao a Mini Trail.

Trátase dunha proba aberta a todas as idades, tendo premios para a categoría sénior, absoluta, veteranos 40 e veteranos 50, repartidas por categoría feminina e masculina e por cada unha das probas, Mini e Gran.

O Concello da Guarda, en colaboración con NOKAO, a Deputación de Pontevedra e as comunidades de montes da Guarda e Camposancos, organiza esta nova edición.