A Guarda ofrece uns faladoiros sobre a muller e a súa saúde

A Guarda ofrece para o próximo xoves 11 de decembro dous faladoiros sobre a saúde da muller. A Casa dos Alonso acolle estes faladoiros impartidos pola enfermeira-matrona Diana Ayude.

De 11:30 a 13:30h a charla dará a coñecer que é a endometriose, os seus principais síntomas e as opcións de tratamento dispoñibles. Búscase informar sobre esta enfermidade crónica e infradiagnosticada, que provoca dor en moitas mulleres.

Ademais, explicaranse os posibles síntomas e tratamentos, así como o procedemento de diagnóstico e as medidas de apoio existentes.

Do mesmo xeito, esa tarde, de 17:00 a 19:00h, o faladoiro tratará sobre a menopausa, para poder comprendela mellor. A charla busca reducir os mitos e medos sobre esta etapa vital, así como informar de hábitos saudables para afrontar esta etapa con máis positividade.

Con este faladoiros, organizados co Centro de Información da Muller (CIM) da Guarda, búscase dar información e resposta ás mulleres sobre a súa saúde diaria.