Local de ensaio

O Concello da Guarda conta, dende novembro de 2008, cun local de ensaio e cabina de grabación  para grupos musicais. Este espazo depende da Concellería de Xuventude e está ubicado no antigo Colexio Manuel Rodríguez Sinde. O obxectivo principal deste local é dar un servizo para que os grupos e solistas que temos entre a mocidade guardesa teñan un espazo axeitado e acondicionado para ensaiar.

Con este proxecto preténdese que todos/as aqueles/as intérpretes musicais da vila que teñan interese ou necesidade de realizar grabacións dos seus traballos poidan facelo. Por outra banda tamén busca tanto fomentar a práctica musical entre os/as mozos/as, como crear un espazo para o intercambio de experiencias relacionadas coa música. O local ten unha dispoñibilidade extensa, xa que pode empregarse calquera día da semana. As persoas que o desexen utilizar só deberán pasarse pola OMIX para solicitalo. Tamén se pode descargar o formulario de solicitude para cubrir na casa.