A Guarda potencia o patrimonio do mar co proxecto «A Guarda, Mar de sal»

O luns 17 de setembro o Concello da Guarda realizou a presentación do proxecto «A Guarda, Mar de Sal», contando coas intervencións de Antonio Lomba Baz, Alcalde da Guarda; Xavier Crespo, Concelleiro de Patrimonio; Brais Currás, coordinador e investigador do proxecto(Investigador do CEAACP da Universidade de Coimbra, e membro do grupo de investigación EST-AP do CSIC); Elena Herbello, Xerente do Galp Ría de Vigo-A Guarda; Mar Cortegoso, directora das escavacións, así coma diferentes persoas vinculadas directa e indirectamente co mesmo.

Para Xavier Crespo, Concelleiro de Patrimonio, este é «un proxecto moi importante para A Guarda, coa posta en valor doutro elemento patrimonial guardés, como son as salinas, unha satisfacción pola traxectoria dende os anos 80´s ata agora».

Brais Currás, coordinador e investigador do proxecto, destacou na súa intervención que «A Guarda, Mar de Sal permitirá potenciar este ben patrimonial a nivel económico, turístico e cultural, cun valor arqueolóxico de importante relevancia e cun proxecto de ciencia cidadá pioneiro en Galicia e España».

Mar Cortegoso, directora das escavacións, explicou aos presentes neste acto que «realizaránse varias sondaxes para ver exactamente o tamaño global desta escavación arqueolóxica no Seixal, abrindo a maiores unha franxa de 200m2 na zona de fincas».

Elena Herbello, Xerente do Galp Ría de Vigo-A Guarda, deu a noraboa polo proxecto e pola implicación do Concello da Guarda, sinalando que «dende o GALP Ría de Vigo-A Guarda apoiamos este proxecto pola súa importancia para o tecido económico, patrimonial e turístico da Guarda e da súa contorna».

Montserrat Magallanes, Concelleira de Turismo, agradeceu a todas as institucións públicas e privadas, así como particulares que dende o principio se involucraron co proxecto.

«A Guarda, Mar de Sal» é un proxecto de recuperación e posta en valor das salinas da zona do Seixal e Camposancos, na fachada atlántica sur do termo municipal da Guarda e, que se levará a cabo en dúas anualidades ao amparo das estratexias de desenvolvemento local participativo EDLP GALP7-066 aprobadas polos Grupos de Acción Local do Sector Pesqueiro para o desenvolvemento sostible das zonas de pesca no marco do Fondo Europeo Marítimo e da Pesca 2014-2020, baixo a coordinación científica de D. Brais Currás.

O obxectivo do proxecto é o desenvolvemento económico local a partir da posta en valor das paisaxes do sal da Guarda como ben patrimonial concibido como ferramenta para a promoción dun turismo sustentable e de calidade, pero tamén como un medio cultural para o reforzo da identidade mariñeira e a cohesión social das comunidades ligadas ao mar.

O proxecto «Mar de Sal» fundaméntase na necesidade de sustentar o desenvolvemento patrimonial sobre un sólido respaldo científico. O estudo rigoroso das paisaxes do sal e a súa posta en valor permitirán crear un recurso patrimonial posto ao servizo da cidadanía.

O proxecto contempla a escavación arqueolóxica, traballos de topografía e prospección, documentación fotogramétrica, rutas guiadas, restauración e consolidación, instalación de paneis informativos, análise edafolóxica, datación por OSL, un proxecto de ciencia cidadá que botará a andar o próximo ano, deseño dunha páxina web, e a edición dunha guía arqueolóxica cos resultados dos traballos.

Coa presente actuación A Guarda recuperará os traballos arqueolóxicos na zona do Seixal, buscando tanto ampliar a zona escavada no ano 2015, como manter visible unha superficie ampla dos restos de salinas que existen nesta zona, aproveitando ademais a existencia da senda litoral, para darlle un maior protagonismo e visibilidade ao xacemento, cunha interesante revalorización cultural e turística deste entorno.

As salinas da Guarda, segundo as escavacións realizadas no ano 2015 no Seixal, poden formar parte dun complexo salineiro de cronoloxía romana de maiores dimensións. O proxecto arqueolóxico permitirá descubrir a súa verdadeira extensión e coñecer con precisión a súa cronoloxía.

Como parte da intervención arqueolóxica, farase tamén unha limpeza no entorno das salinas escavadas na rocha situadas na Armona -na baixada a Camposancos- e levarase a cabo unha prospección sistemática pola costa para a identificación destas estruturas, moi pouco coñecidas e das que case nada se sabe da súa orixe.

Dende o Concello da Guarda agradécese o compromiso de diferentes institucións públicas e privadas, que dende un primeiro momento se comprometeron e apoiaron este proxecto, coma a Entidade Local Menor de Camposancos, o Grupo de Acción Costeira GALP Ría de Vigo-A Guarda, a Confraría de Pescadores Santa Tecla, a Organización de Palangreros Guardeses ORPAGU, o IES A Sangriña, a Asociación Naturalista «Baixo Miño» ANABAM, a Asociación de Redeiras Atalaia, a Deputación de Pontevedra, así como ás institucións científicas encargadas da súa execución: o CEAACP da Universidade de Coimbra UC, a Universidade de Santiago de Compostela USC, o grupo de investigación EST-AP do Consejo Superior de Investigaciones Científicas CSIC, Universidad Complutense de Madrid UCM, e a Universidade da Coruña UDC.

De igual xeito agradécese aos particulares que cederon de xeito gratuíto as súas propiedades para realizar estes traballos de intervención arqueolóxica e de posta en valor das Salinas do Seixal.

O importe total subvencionado por parte da Consellería do Mar é de 74,496,68€, repartidos en dúas anualidades(2018 e 2019). Proxecto GALP7-066.

Máis información no facebook do proxecto