A muralla medieval da Guarda será o tema central da segunda Barferencia do 2023

• O Xoves 11 de maio ás 20:00h no Restaurante Os Remos da Guarda.

Este xoves día 11 de maio, terá lugar no Restaurante Os Remos ás 20:00h. a  barferencia Cal é a orixe da antiga muralla da Guarda? a cargo dos investigadores Rebeca Blanco-Rotea e Francisco Alonso Toucido, que recentemente tiveron ocasión de datala e estudiala.

Rebeca Blanco é investigadora principal da Universidade do Minho, e unha dos maiores referentes en arqueoloxía da arquitectura e da paisaxe, tendo estudado en profundidade, a través da súa tese doutoral e traballos posteriores a paisaxe fortificada na fronteira galego-portuguesa no contexto da Guerra de Restauraçao (1640-1668).  Francisco Alonso, pola súa parte é investigador da Universidade de Santiago de Compostela, no departamento de Historia I, especialista en cerámica medieval e arqueoloxía medieval.

O ciclo de Barferencias 2023, que comezou o pasado 14 de abril cunha barferencia sobre o concheiro do Trega, continuará así mesmo no mes de xuño coa última barferencia adicada á muralla do Castro Santa Trega e o seu sistema defensivo:  “As murallas dos castros: modelos, reconstruccións e interpretacións” por Luis F. López González, 2 de xuño na Casa de la Abuela.

Con este ciclo de charlas divulgativas, nun ambiente distendido e próximo búscase a divulgación da nosa historia e patrimonio.