A programación de Nadal na Guarda se centra nos pequenos e pequenas da casa

Baixo o nome “A maxia do Nadal” concéntranse durante estas dúas semanas unha chea de actividades moi pensadas para as familias.

O Nadal avanza na Guarda coa proposta de actividades variadas pensadas especialmente para as crianzas e as familias. De mércores a venres haberá unha actividade cada día na Praza de Avelino Vicente, onde contamos cunha carpa para poder manter a programación en caso de choiva

O día 27 de decembro comeza a diversión cunha xornada lúdica de xogos populares, entre ás 17h. E as 20h. A idea é converter a Praza e a rúa nun campeiro cos xogos de toda a vida: xogos de puntería, a rá , zancos, construccións, a buxaina… e incluso xogos en grupos se o tempo nolo permite. A actividade está pensada para achegarse en familia ou cos amigos.

O día 28 de decembro continuará o xogo pero en forma de baile e musica. O espectáculo “A bailar no Nadal” é unha proposta interactiva na que a historia e os personaxes desafiarán ao público para seguir as coreografías. A actividade será as 17h. cunha duración estimada dunha hora e vinte minutos.

O día 29 de decembro Paco Nogueiras amenizará a tarde co seu concerto “C@nto contigo”, no que repasará as cancións mais cantareiras e coñecidas do seu repertorio, que sen dúbida as pequenas e pequenos da casa ben coñecen. O espectáculo comezará as 17h. E conta cunha duración estimada de 50min.

Durante o fin de semana a programación infantil dáse unha tregua permitindo aos pequeno continuar cos desprazamentos e as visitas familiares típicas desta época e volverá no seguinte mércores 3 de xaneiro co espectáculo infantil “As Palabras Perdidas”, que da man de Bea Campos (Migallas) e Marcos Alonso (ÁrtikaCía) darán vida á Condesa Colorada e ó seu axudante Leocadio, viaxeiros chegados dende moi lonxe que percorren as vilas e aldeas contando historias, pero ao abrir o libro, cae na conta de que o seu conto está cheo de buracos.

O xoves día 4 a diversión continúa en forma de Xogos, entre ás 17 e as 19h. Os nenos da Guarda terán que superar diferentes xogos, probas e desafíos a cargo dos monitores que dirixen a proposta “Xogos de Nadal”

E como cada ano a programación rematará coa Cabalgata de Reis, que este ano trae importantes cambios, polo que vos emprazamos a permanercer atent@s as seguintes novas.