A V MOSTRA DAS TRADICIÓNS MARIÑEIRAS PRESENTA UN PROGRAMA REPLETO DE EXPOSICIÓNS, OBRADOIROS, MÚSICA E GASTRONOMÍA
Esta edición da mostra rende homenaxe ós “Gameleiros”
A “V Mostra das Tradicións Mariñeiras”, organizada pola Asociación de Redeiras Atalaia e o Concello da Guarda, que se celebra esta fin de semana na localidade, rende homenaxe ó traballo dos “Gameleiros”. Como en edicións anteriores, o lugar de celebración é o Porto da localidade, e a súa programación está chea de actividades para todos os públicos.
Tanto o venres, coma o sábado, e tamén o domingo, estarán abertas varias exposicións. O Museo do Mar, terá aberta a exposición permanente e ademais se ofrecerá unha mostra de diferentes embarcacións tradicionais, entre as que destacarán, por exemplo, a “masseira ancorense” ou a gamela adaptada guardesa.
Na carpa haberá dúas exposicións fotográficas. A primeira delas leva por nome “Gameleiros” e as imaxes son dos autores Miro Villar e Manuel Álvarez. A outra, da man de Aurora Rego, presenta as instantáneas que forman a colección “Familia de pescadores de ascendencia galega”. Neste recinto tamén estará instalada unha taberna mariñeira e será o espazo no que se leven a cabo os diferentes obradoiros.
Diversos colectivos guardeses tamén presentan exposicións na nave das redeiras. Así poderá distinguirse unha de Anabam, outra de CEMMA e tamén do traxe mariñeiro.
Durante os tres días tamén estará colocado un mercado mariñeiro na rúa do Porto que ofrecerá diferentes produtos en diversos stands.
Para os nenos e nenas haberá xogos populares organizados por ALTEGA Educación e Lecer, ademais de piscina para actividades lúdicas ou un concurso de barcos de papel, entre outras actividades.
Os obradoiros e as actuacións musicais diferéncianse por días. Así, mentres os talleres de cerámica, cestería, nós, cordería ou encascado, estarán abertos á participación do público tanto o venres, coma o sábado e o domingo, o obradoiro de foguetes de auga só se realizará o sábado, día 25, pola tarde.
Pola súa banda, o obradoiro de cociña “Ponlle as pilas ó teu bocata” promovido pola Xunta, celebrarase o domingo, dende as 19 horas. As prazas para esta actividade son limitadas polo que os rapaces, entre 4 e 14 anos, deben facer unha inscrición previa.
Os eventos pola noite serán moi variados. Así, o venres, ás 21 horas, terá lugar a “Revista Oral” presentada por Paco Lodeiro, que explicará as diferentes tradicións mariñeiras ó público.
O sábado, dende as 22,30 horas, dará comezo o “Serán Mariñeiro” no que participarán varios grupos de folclore.
Os encargados de pechar as noites desta “V Mostra das Tradicións Mariñeiras” serán os compoñentes do grupo “Pelepau”, que comezarán a súa actuación o domingo a partir das 21 horas.
