Alumnado do CEIP Sinde celebra o Día Mundial do Medio Ambiente

• O resultado final despois de todo o traballo realizado foi a presentación dun cartel do que debes facer para ser un bo Peregrino.

O venres día 4 de xuño de 2021 Salón de Plenos do Concello da Guarda acolleu un acto no cal alumnado do CEIP Manuel Rodríguez Sinde fixeron entrega ás autoridades locais de varios carteis nos que se amosa en tres linguas e con debuxos o que debe de ser un bo peregrino.
Antonio Lomba, Alcalde da Guarda, amosouse moi sorprendido e interesado por esta iniciativa, dando os parabéns aos alumnos presentes, co compromiso adquirido de colocar estes carteis nos espazos polos que circulan os peregrinos que realizan o Camiño Portugués pola Costa ao seu paso pola vila, como é a Estación Marítima, a Oficina de Turismo ou o Albergue Municipal.
Esta iniciativa nace do proxecto de Voz Natura no cal participa este centro educativo da Guarda e no que empregaron o Camiño de Santiago como fío condutor desde Bibliosinde co fin de xuntar esforzos e levar a todo o profesorado pola mesma senda.
Atravesa a nosa localidade un tramo do Camiño Portugués a Santiago de Compostela, polo que involucrar a toda a comunidade educativa foi doado e moi interesante. Descubrindo dúas sendas dun gran valor etnográfico e paisaxístico, o tramo que vai desde a Pasaxe pasando por Camposancos e Monte Trega; e a senda pola costa, Area Grande e as cetarias Redonda e Altiña. Visitouse o albergue de A Guarda e fíxose o tramo que pasa polo centro da vila.
A participación do alumnado na proposta de facer andainas polos diferentes tramos do camiño foi do 100%. Dende os máis pequenos ata os maiores todos os cursos realizaron saídas para coñecelo. Os cursos de 5º e 6º de primaria fixeron un tramo en Oia e visitaron Santiago de Compostela.
A concienciación do alumnado do seu valor e a importancia da súa conservación foron os obxectivos prioritarios, fomentando a participación das familias e facendo as diferentes etapas cos seus fillos e fillas e así conseguiron un selo na súa credencial de peregrinos no Sinde.

O resultado final despois de todo o traballo realizado foi a presentación dun cartel do que debes facer para ser un bo Peregrino. Cartel que se fixo en tres idiomas, galego, castelán e inglés, e no que participou todo o alumnado do centro.