Continúa esta semana o Ciclo Mestre Mateo co documental A Foreign song

• O xoves ás 20:30h no Centro Cultural da Guarda proxección de “A Foreign song”.

O Ciclo de cinema galego Mestre Mateo chega ao seu ecuador na Guarda este xoves ás 20:30h. E o fai da man dun film adicado ao poeta estadounidense Wallace Stevens, A Foreign song: Wallace Stevens. Traballou nunha compañía de seguros durante 40 anos. Todos os días erguíase ás 6 e acostábase ás 9. Nos seus días tranquilos non hai peripecias reseñables, nin grandes dramas. Ninguén diría que este home de vida ordinaria e aburrida é o autor dunha das obras poéticas máis singulares do século XX. Cando se lle pediu unha reseña biográfica para presentar a súa obra, negouse a escribila. Alguén, ao lonxe, observa as casas idénticas nos suburbios solitarios de Estados Unidos. Na cidade dos cartos, onte e hoxe, unha multitude camiña sen descanso.

Este filme foi finalista da XXI EDICIÓN DOS PREMIOS MESTRE MATEO como mellor documental, mellor dirección de fotografía e mellor dirección de produción.

O ciclo de cinema Mestre Mateo que busca achegar as diferentes vilas da xeografía galega os principais títulos da nosa filmografía,  continuará con outras tres entregas na nosa vila no mes de novembro, o filme de animación Unicorn Wars, o 10 de novembro; o duro documental sobre a violencia vicaria Onde mais doe o 16 de novembro e o documental sobre a vida de María Casares, que pechará o ciclo o xoves 30 de novembro. Todos eles serán ás 20:30h. No Centro Cultural e a entrada será de balde.

Esta actividade é promovida pola Academia Galega do Audiovisual  e conta co apoio das catro Deputacións provinciais.

FICHA-RESUMO DA ACTIVIDADE

ACTIVIDADE: CICLO CINEMA GALEGO MESTRE MATEO

LUGAR:  CENTRO CULTURAL A GUARDA

DATA E HORARIO: 26/10/23ÁS 20:30H.

ORGANIZA: Academia Galega do Audiovisual, Deputación de Pontevedra e Concello da Guarda

MAIS INFORMACIÓN: cultura@aguarda.es, ciclomestremateo.gal