O Desfile-Concurso do Martes de Entroido aprázase ao domingo por mor da choiva

O tradicional Desfile-Concurso de Entroido programado para esta tarde aprázase finalmente ao domingo 18 de febreiro por mor das condicións meteorolóxicas adversas para a súa celebración.

Así as cousas, as comparasas, carrozas, grupos e participantes individuais ou en parellas desfilarán o vindeiro domingo a partir das 17:30 horas dende a coñecida como «esquina Famosa» na rúa San Bernardo, para despois percorrer as rúas Porto Rico e Galicia ata chegar á Alameda, onde se darán a coñecer os gañadores en cada categoría do concurso.

As comparsas e carrozas concursarán por un primeiro e segundo premio (dotados de 250€ e 150€, respectivamente), e nas demais categorías repartiranse ata 18 recoñecementos entre os 6 mellor valorados en cada grupo, cun orzamento total de 1.070€.

O desfile porá fin a unha intensa programación de Entroido na vila da Guarda, chea de actividades para todos os públicos.