Este venres comeza o ciclo de Barferencias de Inverno con “A testemuña dun século de Historia” da man de María González Portela
Este venres, 20 de novembro, comeza o ciclo de Barferencias organizado polo Concello da Guarda coa colaboración de ANABAM, para por en valor a cultura e aos veciños e veciñas desta vila.
Nun primeiro momento nesta data ía a ter lugar a conferencia “Testemuñas da represión no Colexio dos Xesuítas de Camposancos” pero, por motivos de saúde, Francisco Álvarez García (Paco mi Vida) tivo que ser cancelala.
No seu lugar a primeira “Barferencia de Inverno” será “A testemuña dun século de Historia” na que participará María González Portela, veciña guardesa que este mesmo mes cumpriu os 100 anos.
María González Portela falará aos presentes de como viviu ela, e tamén a vila, os distintos cambios políticos e sociais e as diferencias máis salientables da Guarda de hai 100 anos. A través da súa vida e da súas experiencias, rememorando as súas vivenzas, problemas e necesidades, María tamén contará a vida desta poboación.
A cita é ás 20 horas no restaurante O Cangrexal, situado no Porto.
Próximas citas
As seguintes Barferencias xa están marcadas no calendario. Todas serán as 20,30 horas.
Así, o xoves 3 de decembro, Rafael Rodríguez falará sobre “Reescavando Mergelina” na cervexería ITACA, o venres 28 de decembro, na Casa dos Alonsos, Mar Cortegoso falará de “A salina do Seixal” e o venres 25 de xaneiro, Xosé Manuel Malheiro no bar Tecla´s será o poñente da barferencia “De Luis Vello a Alonso Ríos, viaxe polas escolas de Galicia”.
Pola súa banda, Roberto Rodríguez Álvarez, o venres 29 de xaneiro, no bar Bergantín, presentará a “Talasonimia da costa da Guarda” e Fani Alonso Tamayo porá a guinda a este ciclo de charlas, o venres 26 de febreiro no bar Aquilino, falando de “15 pesetas por frete”.