«Fillos do sol» chega á Guarda coa súa versión dos últimos anos de Eduardo Pondal

A obra «Fillos do sol» representarase na Guarda o vindeiro 12 de maio ás 20 h. As entradas poderán recollerse de balde no Centro Cultural a partir do 5 de maio.

O Centro Cultural da Guarda acollerá a obra teatral «Fillos do sol» o vindeiro sábado 12 de maio ás 20 h. A peza, coproducida pola compañía teatral Contraproducións e o Festival Internacional Outono de Teatro (FIOT) de Carballo, ofrece una versión dos últimos anos da vida do poeta Eduardo Pondal, cando nunha pensión da Coruña trata de rematar a súa obra épica Os Eoas.

En escena, o xa octoxenario bardo galego afrontará o seu último traballo comesto pola neurose, os medos e as insatisfaccións creativas, acompañado por un personaxe nacido da súa imaxinación e lembranza: un mozo Eduardo nos seus inicios como poeta.

O elenco de actores está formado por César Cambeiro no papel de Pondal vello, Adrián Ríos como Pondal novo e Alba Bermúdez no papel de Rosa, a serventa da pensión. Todos eles manteñen unha relación divertida e emotiva ó mesmo tempo, na que se abordan temáticas como os perigos do perfeccionismo, os usos da lingua, a emigración e mesmo a emancipación feminina.

Escrita e dirixida por Cándido Pazó, a obra concíbese como unha homenaxe ao controvertido escritor no centésimo aniversario da súa morte. Pondal foi, xunto con Rosalía de Castro e Manuel Curros Enríquez, «un dos tres pés poéticos do Rexurdimento Galego», destacan dende a produtora.

As entradas para acceder ao espectáculo poderán recollerse de balde dende o mañá, 5 de maio, no Centro Cultural no seu horario de habitual de apertura (de 10 a 13 h de luns a venres e de 10 a 13 h os sábados). «Fillos do sol» forma parte da programación da Concellería de Cultura con motivo da celebración do Día das Letras Galegas.