Fin de semana moi dinámica na Guarda
Está organizado un trail, unha charla, teatro, un concerto e unha romería
Esta fin de semana son moitos os eventos organizados na localidade da Guarda. Durante todo o sábado e tamén o domingo, os veciños e veciñas, e tamén visitantes no municipio poderán escoller entre a seguinte programación.
Así, o sábado, 28 de novembro, ás 20 horas As Xuventudes Socialistas de A Guarda retoman o ciclo de charlas sobre o Colectivo LGTBI. A cita, como en anteriores ocasións, é no Centro Cultural.
O acto, que está aberto a todo o público, contará coa presenza de Estela Fernández, experta en Igualdade, e Carmen Gallego, Parlamentaria do PsdeG-PSOE e impulsora da Lei pola Igualdade de trato e a non discriminación do colectivo LGTBI en Galicia.
Media hora máis tarde, ás 20 horas, na Igrexa Parroquial de Santa María, a Agrupación Musical de A Guarda organiza o Concerto de Santa Cecilia.
Neste recital en honor a patroa da música, actuarán a Banda Infantil da Agrupación Musical da Guarda e a Agrupación Musical.
O domingo, 29 de novembro, a actividade comeza ben cedo xa que para esta data está programado o II Trail do Trega.
Simultaneamente nesta proba haberá unha andaina e un trail.
A saída da andaina comezará ás 9,15 horas dende a explanada de A Sangriña. Dende ese mesmo punto, os corredores, comezarán o seu trail ás 10 horas.
En total a distancia da carreira é de 18 km e da andaina 10 km.
Ademais pola mañá, terá lugar a Romaría de Santa Catalina na Cruzada. Ás 11,30 horas celebrarase a Misa seguida da procesión acompañada polo grupo folclórico Xamaraina. Está organizado pola Comisión de Festas de San Caetano.
Por último pola tarde, a Asociación das Mulleres Progresistas da Guarda, organizan unha tarde de teatro. O grupo “Tarantela” presenta “O achado do Castro” no Centro Cultural guardés ás 19 horas.