Gran éxito na Guarda do primeiro roteiro guiado da iniciativa “Historias de mulleres guardesas”
- Preténdese poñer en valor a figura de diferentes mulleres da vila, tanto anónimas como coñecidas, que destacaron na súa época por rachar cos estereotipos e intentar acadar un espacio dentro dun mundo do que non eran donas.
- As prazas para o vindeiro roteiro están xa esgotadas, pero aínda quedan prazas libres para as dúas andainas no mes de novembro.
O Concello da Guarda, a través da Concellería de Igualdade e o Centro de Información á Muller, iniciou o pasado venres a iniciativa “Historias de mulleres guardesas”, unha alternativa de ocio cultural e saudable na que o eixo principal son as historias de mulleres da vila que destacaron nas súas diferentes épocas por diversas razóns.
O Primeiro roteiro tivo lugar o pasado venres día 14 de outubro e congregou a máis de medio cento de persoas que saíron dende a Praza do Reló, para facer un percorrido guiado polo casco histórico da vila e rematar na fonte da ribeira no Porto da Guarda cunha amenización musical a cargo do cantautor guardés Tino Baz.
Nos roteiros, dos que só queda a quenda do 28 de outubro en horario de 20:00h a 21:00h(prazas completas) fálase dunha serie de mulleres, todas veciñas da Guarda, que dun xeito ou doutro forman parte do imaxinario colectivo e da historia da vila, cunha breve achega biográfica para lembrar como foi ou como é a vida destas mulleres e poñerlle cara amosando fotografías para que todos/as os/as participantes as recoñezan.
No caso das andainas, que terán lugar o 13 e 27 de novembro en horario de 10:30h a 13:30h(aínda quedan prazas libres) e que sairán dende a Alameda da Guarda (8km de percorrido e dificultade media), falarase de mulleres de Salcidos e Camposancos, tendo en conta fundamentalmente os traballos e oficios aos que se adicaban, e lembrando a algunhas persoas que viven ou viviron nestas dúas parroquias, amosando tamén imaxes delas para saber quen foron ou son as protagonistas destas historias.
As inscricións continúan abertas para as andainas na recepción do Concello, chamando ao 986610000 ou no enderezo electrónico conserje@aguarda.es
As actividades son gratuitas e as prazas limitadas.
Actividade subvencionada pola Deputación de Pontevedra
