Libros e espectáculos na novena edición da Feira do Libro da Guarda
Para rematar a semana na que se acolleron os diferentes actos en celebración do Día das Letras Galegas, o Concello da Guarda organiza a novena edición da súa Feira do Libro. Esta terá lugar o vindeiro domingo día 22 durante toda a xornada.
Para rematar a semana na que se acolleron os diferentes actos en celebración do Día das Letras Galegas, o Concello da Guarda organiza a novena edición da súa Feira do Libro. Esta terá lugar o vindeiro domingo día 22 durante toda a xornada.
Ademais dos postos das librerías, que abrirán á partir das 11 da mañá e nos que se poderán mercar libros cun 20% de desconto, na Prazá do Reló ofreceranse diversos espectáculos e actuacións que farán as delicias de toda a familia.
Pola mañá, ás 12:30 horas dará comezo unha das actividades centrais que será a sesión de contos “Os contos da barriga verde” que corre ó cargo de Fran Rei, cofundador e coordinador de “Os Sete Magníficos máis un”, a compañía oficial do Festival Internacional de Clown de Galicia.
Neste novo espectáculo, que ven de presentar na primavera e que chegará o domingo á Guarda, representará o guión que escribiu xunto a Avelino González a partir de tres das obras do escritor homenaxeado este ano polo Día das Letras Galegas, Manuel María (“Barriga Verde”, “Os Soños na Gaiola” e “Aventuras e Desventuras dunha Espiña de toxo chamada Berenguela”).
“Os contos da barriga verde” narra a historia de Fiz, un mozo labrego galego que se enfrontará ao Serrador e ao Demo polo amor de Catuxa, para o que contarácoa axuda da maxia do seu padriño Barriga Verde coa fin de demostrar que non hai nada máis forte que o amor verdadeiro.
Pola tarde será o turno do espectáculo “Falar sen cancelas”, no que repite o cómico Fran Rei, desta volta acompañado por Pedro Brandariz e Isabel Risco. Xuntos os tres cómicos ofrecerán unha actuación na que se pon en evidencia a súa compenetración tras 15 anos colaborando sobre os escenarios a través dunha serie de monólogos propios, gags, recursos e xogos de improvisación que fan que cada vez que representan este espectáculo sexa diferente á anterior. “Falar sen cancelas” traerá á Guarda unha gala de humor, maxia e improvisación coa palabra e a lingua como grandes protagonistas.
Tras esta intensa xornada de libros e espectáculos variados a Feira do Libro da Guarda rematará cara as 21 horas da noite co sorteo de libros e o Peche da Feira.
