Máis dun centenar de veciños e veciñas guardeses e de Caminha percorreron a primeira etapa do Camiño de Santiago da Costa
Esta actividade organizada entre ambos concellos está enmarcada dentro das iniciativas organizadas para promocionar a Candidatura do Esteiro do Miño coma Paisaxe Cultural da UNESCO
Este sábado, 5 de marzo, máis dun centenar de veciños e veciñas da Guarda e da vila portuguesa de Caminha percorreron a primeira das etapas do Camiño de Santiago pola Costa. Traxecto que separa Àncora, en Caminha, de Mougás, en Oia, un total de 28 quilómetros.
Os participantes guardeses comezaron a súa andanza collendo un autobús ás 08,30 horas da mañá na explanada da Sangriña que os levou ata a Igrexa Parroquial de Áncora, onde esperaban os camiñantes portugueses.
Dende este punto camiñaron ata o ferry que une Caminha con A Guarda. Despois das 13 horas xa estaban en Galicia.
Os participantes seguiron o seu camiño ata o albergue guardés, lugar onde o Concello tiña preparado un recibimento coa actuación duns gaiteiros para amenizar o almorzo.
Tras esta parada continuaron o seu camiño ata chegar a Mougás. Os claros e as chuvias acompañaron a estes peregrinos durante todo o seu traxecto.
Esta primeira etapa e tamén primeira iniciativa dentro das actividades enmarcadas para promocionar a Candidatura do Esteiro do Miño coma Paisaxe Cultural da UNESCO por parte do Concello da Guarda e da Càmara Municipal de Caminha, contou cunha ampla participación.
Próximas etapas
Aínda hai prazas libres. Aquelas persoas que queiran máis información para participar nesta actividade poden dirixirse a Oficina de Turismo do Concello da Guarda, escribir á dirección turismo@aguarda.es ou chamar ao teléfono 986 61 45 46.
2ª etapa
12 de marzo: Mougás – Vigo 28 km
Saída ás 9 da Sangriña, onde esperaremos a que cheguen os participantes de Caminha. Desde Mougás comezamos a camiñar cara Baiona, Nigrán polo núcleos da Ramallosa, Panxón e rematamos esta etapa na igrexa románica de Coruxo de Vigo.
3ª etapa
02 de abril: Vigo – Redondela: 23 km
Saída da Sangriña ás 8.30h. Iremos cara Goián onde nos xuntamos cos participantes procedentes de Caminha. Iremos en bus ata Castrelos onde comezaremos a camiñar logo de visitar a fermosa igrexa románica. Seguimos pola senda do Lagares, cruzamos Vigo por Sárdoma, Senda da Auga, Chapela e a etapa conclúe no centro de Redondela localidade na que conflúe o Camiño Portugués da Costa e o do interior que parte de Tui.
4ª etapa
16 de abril: Redondela – Pontevedra 21 km
Saída da Sangriña ás 8.30h. Iremos cara Goián onde nos xuntamos cos participantes procedentes de Caminha. Abandonamos pouco a pouco a ría de Vigo polo concello de Soutomaior. Cruzamos ó río Verdugo pola Ponte de Sampaio e dirixímonos por varias poboacións do concello de Vilaboa e por Tomeza entramos na cidade de Pontevedra onde nos agarda o santuario da Virxe da Peregrina.
5ª etapa
23 de abril: Pontevedra – Caldas de Reis: 22 km
Saída da Sangriña ás 8.30h. Iremos cara Goián onde nos xuntamos cos participantes procedentes de Caminha. Cruzamos Pontevedra pola ponte do Burgo cara pequenos pobos de Barro e As Portas ata cruzar o Umia xa en Caldas de Reis onde finaliza esta etapa.
6ª etapa
07 de maio: Caldas de Reis – Padrón: 18 km
Saída da Sangriña ás 8.30h. Iremos cara Goián onde nos xuntamos cos participantes procedentes de Caminha.
Iremos cara o Concello de Valga para despedir a provincia de Pontevedra cruzando o río Ulla por Pontecesures e entrando por Padrón xa na provincia da Coruña.
7ª etapa
14 de maio: Padrón – Santiago de Compostela: 25 km
Saída da Sangriña ás 8.30h. Iremos cara Goián onde nos xuntamos cos participantes procedentes de Caminha. Polos municipios de Padrón, Teo e Ames chegamos o final da viaxe, cruzando a histórica Porta Faxeira, animada rúa do franco e por fin a Catedral de Santiago.
