O ALCALDE DA GUARDA, ANTONIO LOMBA, RECIBIU NO CONCELLO O DELEGADO TERRITORIAL DA XUNTA EN PONTEVEDRA, JOSÉ MANUEL CORES TOURÍS
O alcalde da Guarda, Antonio Lomba, recibiu esta mañá no Concello a visita do Delegado Territorial da Xunta de Galicia en Pontevedra, José Manuel Cores Tourís.
Este encontro está enmarcado dentro da axenda de visitas que Cores Tourís ten fixadas en todas as localidades pontevedresas que nas últimas eleccións cambiaron de alcalde.
Este encontro, que tivo lugar no despacho do Alcalde, Antonio Lomba o aproveitou para trasladarlle o Delegado Territorial da Xunta, as diversas peticións dos veciños e veciñas da Guarda.
A primeira das demandas foi que a vila sexa incluída dentro do transporte metropolitano para poder abaratar os custos das viaxes de todos eses veciños e veciñas que teñen que trasladarse a Vigo ou a Tui con regularidade.
Seguindo esta liña, o alcalde, comentou a importancia do remate da vía de alta capacidade que una a Guarda con Tui. “Esta é unha petición primordial, tanto a nivel sanitario coma laboral”, comentou Lomba. O alcalde afirmou que é moito o tempo que leva, por exemplo trasladarse a Porriño ou a Vigo. Cores Tourís, atento a esta petición, afirmou que el mesmo o notara á hora de chegar a dita visita.
Con estas dúas demandas, afirmou o alcalde, trataríase de fixar poboación na Guarda, e intentar que por motivos de traballo non tiveran que trasladarse a vivir a outra localidade.
Antonio Lomba aproveitou esta cita para informarlle que, nos próximos días, lle farán chegar á Xunta o proxecto de acceso a praia do Muíño. Neste proxecto se ordenará o tráfico grazas a unha rotonda, se reordenarán os aparcamentos e se mellorará a fachada da praia. Sobre este punto Cores Tourís dixo estar informado e a espera de recibilo para poder tomar unha decisión.
O alcalde falou tamén do proxecto de instalación do polígono industrial A Guarda – Rosal, demandado e necesario tanto para as empresas da zona como para reducir a taxa de paro. Lomba falou ademais da instalación dun auditorio multiusos na localidade, edificio moi demandado polos veciños e veciñas xa que son moitos os eventos que se celebran na Guarda e pouco o aforo dos espazos dispoñibles.
Lomba recordou ademais có Concello está pendente dun proxecto de reforma da Praza de Abastos. En este punto, o delegado da Xunta en Pontevedra, comentou que “nos próximos días” recibirán a resolución destas axudas xa que están “totalmente valoradas”.
Por último, o alcalde da Guarda, trasladoulle a Cores Tourís a necesidade de mobiliario para o novo edificio que fará as funcións de Concello, a Casa dos Alonso. O delegado da Xunta comentou que aínda non sabían se este ano sairían axudas para este tipo de partidas pero que, se tiveran algunha información ó respecto, lla trasladaría.
Neste encontro cordial entre Antonio Lomba, alcalde da Guarda e Cores Tourís, o delegado da Xunta púxose a dispoñibilidade do Concello para todas aquelas demandas nas que puideran axudar. “Imos vendo todos os proxectos e terás noticias nosas en canto poidamos”, díxolle Cores Tourís.
Na cita tamén houbo tempo para falar dunha maneira distendida nos éxitos conseguidos, por exemplo, polo equipo feminino de balonmán da Guarda.
