O Centro Cultural acolle unha obra teatral de temática LGTBIQ+ no rural
O Centro de Información á Muller do Concello da Guarda, na súa programación de outono, presenta o proxecto “Diversidade sen atrancos”, coa finalidade de promover o uso da nosa lingua con accións que activen a concienciación do respecto á diversidade e á diferenza, subvencionado pola Consellería de Cultura, Lingua e Xuventude.
Este proxecto componse de dúas actividades, por unha banda temos unha proposta cultural, dirixida ao público en xeral e por outra,uns obradoiros que levan por título “Quen é quen?” dirixidos ao alumnado de Formación Profesional e da ESO, onde aprenderemos as diferentes identidades de xénero e as orientacións do desexo.
O obxectivo é fomentar a comprensión, o respecto e a empatía cara a diversidade. Queremos crear un espazo seguro onde o alumnado poida dialogar sobre estes temas de maneira aberta e libre de prexuízos.
O día 4 de outubro contaremos coa representación teatral de Brokeback Sabucedo, terá lugar no Centro Cultural da Guarda ás 20:30 horas. A entrada é de balde ata completar o aforo.
A peza busca deixar de estigmatizar a diversidade sexual, amosando a realidade LGTBIQ+ dende unha perspectiva realista. Brokeback Sabucedo é un canto á diversidade e unha homenaxe a tradición galega, situándose no ámbito rural de Galicia, concretamente na celebración da Rapa das Bestas de Sabucedo.
