Os Reis Magos visitaron A Guarda

• Fixeron un percorrido en vehículos clásicos polas principais rúas e barrios da vila

Despois da súa visita á Residencia Santa Tecla na xornada do martes 4 de xaneiro, o pasado mércores día 5 de xaneiro os Reis Magos voltaron á Guarda para realizar un percorrido polas principais rúas e barrios da vila.

Seguindo o programa previsto os Reis Magos foron recibidos polo alcalde ás 17:30h na Praza do Reló, dende onde saíu a comitiva real para visitar as principais rúas e barrios da vila, escoltados pola Policía Local e o GES.

No seu percorrido visitaron o Castro, a Proba, Pintán, A Gándara, Saa, Camposancos, O Porto da Guarda, rematando a súa visita á Guarda na Alameda. Foron moitos os nenos e nenas da vila que saíron á rúa para ver ás súas maxestades de oriente, nunha xornada de moita ilusión para os máis pequenos.