Pepe Carreiro presenta ao alumnado guardés «Os Bolechas na desembocadura do Miño»

O alumnado dos colexios da Guarda recibiu esta mañá ao autor do novo libro «Os Bolechas na desembocadura do Miño», Pepe Carreiro, acompañado polo alcalde do Concello da Guarda, Antonio Lomba, e a concelleira de Educación, María Elena Baz.

Os representantes municipais visitaron anteriormente os centros escolares do municipio para facer entrega da publicación -ambientada na Guarda e a súa contorna- ás alumnas e alumnos de todos os cursos de educación especial, infantil e primaria, de xeito que puidesen ler e ollar a obra antes da súa presentación oficial co autor.

Ao acto de presentación, celebrado na Casa dos Alonso, acudiron máis de 200 cativos e cativas dos centros de educación primaria e infantil PP. Somascos, As Solanas, A Sangriña e M.R. Sinde, o centro San Xerome Emiliani e a escola de educación infantil da Gándara.

As pequenas e pequenos tiveron a oportunidade de aprender a debuxar os populares personaxes creados por Pepe Carreiro e mesmo de resolver as súas dúbidas. Así, Carreiro confesou non ter un Bolechas favorito e lembrou o seu primeiro libro («Os Bolechas lavan o can») publicado fai  18 anos e ao que se seguiron máis de 500 novas historias, tres das cales teñen A Guarda como protagonista.

«Os Bolechas na desembocadura do Miño»

A popular familia de irmáns Bolechas e o seu can trasládanse nesta ocasión á parroquia de Salcidos, onde reside a súa amiga Sabela. Ela levaraos pola beira do río Miño -pasando pola Xunqueira, a praia do Muíño e o Puntal, entre outras localizacións- á procura dun mazarico. No proceso, os cativos coñecerán novos lugares, así como a fauna e a flora característica da vila guardesa.

A edición do libro contou co financiamento da Deputación de Pontevedra  no marco das axudas para a dinamización lingüística da institución provincial.