Remata a programación da terceira edición de A Guarda Diversa

As actividades de “A Guarda Diversa 2022” comezaron na xornada do martes día 28 coa colocación da bandeira do colectivo e coa publicación na web municipal e nas redes sociais do vídeo co Manifesto a cargo do Alcalde da Guarda, Antonio Lomba, onde indicou que “A Guarda é afortunadamente un municipio diverso, moderno e inclusivo. Por iso desde o Concello sentímonos moi orgullosos por poder poñer o noso pequeno gran de area para seguir apoiando, dando visibilidade e sobre todo loitando pola diversidade, porque a diversidade é unha ferramenta de futuro, un motor de cambio e evolución”.

A Concelleira de Igualdade, Fátima Rodríguez, resaltou que “nesta terceira edición de A Guarda Diversa celebrouse o respecto, a tolerancia e a empatía como formas de convivencia, e o amor en calquera das súas formas. O equipo de goberno segue traballando para desmontar estereotipos e evitar calquera tipo de acoso ou agresión por cuestións de orientación sexual ou identidade de xénero na nosa vila”.

A parte central das actividades tiveron lugar o xoves día 30 na Praza do Reló coa Mesa Redonda “A nosa Memoria tamén é diversa”, onde contouse coa presencia de Eva Mejuto, escritora e activista LGTB, Daniela Ferrández, activista Trans, e Marcos López, comisario do proxecto “Memoria diversa” da Deputación da Coruña. O acto estivo presentado por Sara Uris de Transformando Realidades e a Concelleira de Igualdade, Fátima Rodríguez.

Durante a mesa redonda, á que asistiron preto de medio cento de persoas, tratáronse temas sobre a memoria das persoas Lesbianas, Gais, Bisexuais e Trans, temas que ata o momento quedaran fora dos estudos memorialísticos galegos. Destacaron, neste ámbito, as investigacións de Daniela Ferrandez e o libro de entrevistas a maiores LGBT “Memoria Diversas” de Eva Mejuto, que centrarán a conversa moderada por Marcos López.

Continuando a programación, tamén na xornada deste xoves tivo lugar na Praza do Reló o Espectáculo “Noite de Cabaret”, a cargo da Compañía teatral “Marinita y sus maromas”, unha proposta rompedora na que o elenco travestiuse e xogou cos xestos, a interpretación, a maquillaxe, a roupa e o xénero. Reivindicando e apoderando a palabra travesti mediante os seus espectáculos teatrais, en formato de comedia musical. Números de baile, canto, transformismo, clown. Empregaron a arte escénica para reflexionar sobre o xénero, xogando coas características que o definen. Normalizando os corpos e as formas de amar disidentes. Utilizan tamén o humor para caricaturizar a nosa sociedade e visibilizar o absurdo e ridículo das normas e modelos de conduta cos que convivimos.

Xa para pechar a programación de “A Guarda Diversa 2022”, na xornada deste venres día 1 de xullo, tivo lugar no Castelo de Santa Cruz un contacontos e un obradoiro titulado “Os Bolechas: Somos como as cores do Arco da Vella”, a cargo da Asociación Nós mesmas e dedicada a público infantil de entre 3 e 8 anos. A este acto acudiron o Alcalde da Guarda, Antonio Lomba e a Concelleira de Igualdade, Fátima Rodríguez, xunto coa Directora do CIM, Yolanda Villaverde. Contou ademais coa presencia dos nenos e nenas do Campamento de verán municipal e público en xeral.

Remata deste xeito na Guarda una programación que chega este ano a súa terceira edición de A Guarda Diversa co obxectivo de promover os valores de igualdade e respecto entre as persoas e o apoio ao colectivo LGTBIQ+.