Remata «Tecnoimaxín» na Guarda cunha Feira de Empresas

Este sábado día 27 de outubro celebrouse na Casa dos Alonsos da Guarda a derradeira xornada da Feira do Emprego e Formación «Tecnoimaxín, cunha Feira de Empresas da comarca cun rasgo innovador, presentada pola Coach e psicóloga social Susana Rodríguez.

Nesta edición contouse coa participación de empresas e empresarios da comarca coma Imersys Ceramics, Bonos Bienestar, Coballes, Fernando Coello, Alicerce, Comunica e Randstad.

Ademáis desta Feira de Empresas, realizouse unha Charla sobre «Nova perspectiva nos Recursos Humanos, unha mirada sensible na era tecnolóxica» a cargo de María Caeiro, Conselleira delegada do Grupo Caeiro, que puxo o broche final a esta edición de «Tecnoimaxín».

Tamén nesta xornada o grupo Randstad, empresa líder en traballo temporal e recursos humanos, realizou unha recollida de CV´s para as súas bases de datos para posibles vacantes nos diferentes postos que ofertan na actualidade, momento que aproveitaron moitos veciños e veciñas da comarca do Baixo Miño na procura de emprego.

A Feira do Emprego e Formación «Tecnoimaxín» remata na Guarda contando cunha ampla programación de actividades que ao longo de 3 días se celebraron na Casa dos Alonsos, un evento que estivo dirixido a estimular o talento e crear cultura emprendedora na comarca do Baixo Miño.

O proxecto conta cunha páxina web (www.imaxinaguarda.com) onde se pode consultar informacións de interese sobre este Feira do Emprego e Formación, que aspira a converterse nunha cita obrigada para todas aquelas persoas interesadas en coñecer máis sobre as novas tecnoloxías, a formación continua e emprego, novas vías de negocio, entre outras novidades do sector empresarial.