Xa se pode retirar efectivo na estación de servizo de San Roque
A estación de servizo de San Roque conta xa co novo servizo de retirada de diñeiro en efectivo. O pasado domingo, a conselleira de Economía e Industria, María Jesús Lorenzana, visitou esta estación estreando o servizo na gasolineira.
Este servizo ofrécese ao estar esta estación de servizo adherida ao convenio de colaboración que asinaron a Xunta de Galicia, Abanca e a Federación Galega de Estacións de Servizo (Fegaes).
Este acordo permite que naqueles concellos galegos con menos de 20.000 habitantes sexa posible retirar pequenas cantidades de diñeiro nas estacións de servizo adheridas, que contan con terminais de puntos de venda (TPV) de última xeración habilitados.
“É un novo servizo que gaña toda a veciñanza e tamén os visitantes, ademais no único establecemento de gasolineira que conta con persoal 24 horas”, afirma o alcalde da Guarda, Roberto Carrero.
Esta iniciativa ten como obxectivo ampliar o catálogo de servizos destes establecementos e achegar este servizo a outras zonas onde non chegan caixeiros ou oficinas. En total, xa hai máis de 75 gasolineiras con este servizo en Galicia, que se irá estendendo polos 290 concellos de menos de 20.000 habitantes.
