Zona Franca analiza o apoio ao sector da flor cortada e planta ornamental
- David Regades recibiu ao alcalde da Guarda e aos directivos de Flores Toxal, que teñen en marcha un plan de inversión para medrar un 10% anual ata 2030
O Consorcio da Zona Franca analiza as posibilidades de apoio ao sector da flor cortada e planta ornamental, que conta cunha produción relevante na área de Vigo. Con este obxectivo realizará un estudo específico deste sector na zona do Baixo Miño, dentro dun plan estratéxico que ten en marcha para a provincia. Ademais, o delegado do Estado, David Regades, acompañado polo alcalde da Guarda, Antonio Lomba, recibiu aos directivos da primeira empresa galega do sector, Flores Toxal, que lle presentaron o seu plan de inversión para medrar un 10% anual ata 2030.
O delegado do Estado, David Regades, explicou que “o sector da flor cortada e a planta ornamental ten un potencial de crecemento importante polas condicións climatolóxicas idóneas do sur de Galicia, por elo dende a empresa de capital riesgo Vigo Activo estamos estudando as posibilidades de acompañar o proceso de crecemento”.
O alcalde da Guarda, Antonio Lomba, entende que “é moi importante para A Guarda a implicación de Zona Franca apoiando ao sector empresarial, temos moito potencial para levar adiante proxectos que reactiven a comarca e actúen como dinamizadores da economía e do emprego”, por iso agradece a recepción por parte do delegado do Estado.
A empresa Flores Toxal, con sede na Guarda, ten máis de trinta anos de actividade e, ademais da produción propia, comercializa flores cortadas de agricultores da zona e do resto de España e importa flores. A compañía prevé un crecemento este ano que ronda o 38%, a pesares de que as vendas se teñen visto afectadas polas restricións da pandemia, xa que o mercado da flor cortada está ligado co ocio e as celebracións. Só a produción de Lilium creceu un 90%.
Os empresarios Serafín Domínguez Santomé e Alfonso Álvarez Cobián fixéronse coa dirección trala xubilación dos anteriores socios e puxeron en marcha un plan de inversión que prevé acadar un crecemento medio anual en vendas do 10% ata 2030.
Entre as súas fortalezas, está unha carteira de máis de 400 clientes en toda España e que en 2021 teñen empezado as exportacións a Holanda, como socios de Royal Flora Holland.
