A Festa Miudiña reúne a todo o alumnado guardés para despedir o curso

A Guarda celebra este mércores 19 de xuño a Festa Miudiña para todo o alumnado de Infantil e Primaria do concello. A partir das 9:30 da mañá, a rapazada irá chegando ao castelo de Santa Cruz, onde lles agardan diversas actividades.

Polo castelo haberá diversas actividades e xogos, con dúas zonas diferenciadas: Infantil e Primaria. As diferentes clases irán rotando en quendas e tamén desfrutarán dunha pausa para a merenda, grazas á colaboración coas ANPAS.

Ademais, contaremos coa asistencia dos Bolechas que traerán consigo o libro que protagoniza a nosa vila.

Trátase dunha actividade organizada polo Concello da Guarda en colaboración coa Deputación de Pontevedra, Alalá Sociedade Cooperativa, AGA Formación, Diviertt e A Esgalla ademais do profesorado dos diferentes colexios. Está organizada pola concellería de Xuventude.