A Guarda congrega dende este xoves numerosas actividades

A Guarda será dende este xoves o foco para a formación e o emprego na Comarca do Baixo Miño coa celebración da Feira «Tecnoimaxín, un evento que terá lugar na Casa dos Alonsos e que congregará a expertos do sector, que realizarán conferencias e charlas, así coma a realización de exhibicións de robótica ou unha feira con exposicións empresariais. A maiores deste gran evento do sector, A Guarda contará tamén con outras actividades como unha charla sobre saúde para a xuventude, a inauguración dunha exposición, unha obra teatral ou actividades infantís para celebrar o día mundial das Bibliotecas.

Xoves 25 de outubro:

Na xornada do Xoves día 25 de outubro A Casa dos Alonsos da Guarda acollerá a inauguración da Feira do Emprego e Formación «Tecnoimaxín» dende as 10:00h da mañá, contando neste día cun obradoiro sobre «competencias Emocionais para afrontar un futuro laboral dixitalizado» a cargo de Gema Sánchez Cabezuso, unha Charla sobre «Proxectos da Zona Franca de Vigo» a cargo de Débora Ramonde e unha Charla sobre «A Felicidade nas novas organizacións» a cargo de Jaume Gurt.

Tamén nesta xornada ás 12:30h realizarase no Centro Cultural da Guarda a Charla «Tempo de Saúde», impartida pola doutora Olga Villar Moreira, dirixida principalmente á xuventude guardesa, e onde se abordará a «Nutrición e saúde, Trastornos alimentarios», unha actividade que terá unha hora de duración e que rematará cun coloquio-debate coas persoas asistentes.

Para rematar esta xornada ás 20:00h o Centro Cultural da Guarda acolle a Inauguración da Mostra GalizAmérica, que contará coas intervencións de Elena Baz Rodríguez, Concelleira de Cultura; Xosé Leal Fariña, Deputado de Cultura e Lingua; Antonio Lomba Baz, Alcalde da Guarda e Carmen Carreiro, comisaria da mostra. Despois dun breve percorrido pola mostra, darán comezo as microconferencias de Mónica Rebolo Sempre en Galicia, a voz dos galegos no río da Prata e Phillip Duncan Webb, Entre Vigo e Asunción: Avelino Rodríguez Elias no exilio (1936-1958).

Venres 26 de outubro:

Na xornada do venres 26 de outubro e enmarcado na Feira do Emprego e Formación «Tecnoimaxín» de 10:00h a 12:00h realizaráse unha Conferencia/Exhibición sobre a Robótica de Competición a cargo de Manual Rodríguez e Alejandro Santos, técnicos de hardware e software de OPRobots.

Estes dous técnicos explicarán aos presentes como é o seu traballo e como aprenden día a día a facer cousas novas enfrontándose aos mellores enxeñeiros do país. OPRobots exporá as súas creacións amosando como é o seu funcionamento, fomentando a creatividade e innovación a través dos robots de competición de carácter Velocistas, Humanoides, Laberinto e Minisumo).

Ás 12:30h está prevista a realización dunha charla a cargo de Óscar Rodríguez, Coordinador xeral de Ledisson Ait, programación robótica, sobre «A disrupción laboral: unha verdade incómoda».

Trala pausa da comida, ás 16:00h Emilia Simao e Samuel Barbosa, profesores de multimedia e arte da Escola Superior Gallaecia falarán sobre «Tecnoloxía vs Arte – Video 360º».

De seguido, ás 17:30h Brais Currás e Mar Cortegoso realizarán unha Conferencia/Exhibición sobre «Transferencia e innovación: as paisaxes do sal como recurso económico».

Xa para rematar a xornada deste venres, ás 21:00h o Centro Cultural da Guarda acolle a representación do espectáculo teatral «Chola it a girl» da compañía de teatro ArtesaCía co elenco de Laura Villaverde, é preciso retirar as entradas con antelación no Centro Cultural da Guarda.

Sábado 27 de outubro:

Na mañá do Sábado día 27 de setembro de 2018 a partires das 11:30h terá lugar na Biblioteca Pública Municipal da Guarda unha nova sesión de «Contos Contados» a cargo de Nelson Quinteiro co seu espectáculo «Pequeno Cabaret Infantil», unha actividade programada para celebrar o Día das Bibliotecas que ten lugar cada 24 de outubro.

Dentro da Feira do Emprego e Formación «Tecnoimaxín» o sábado terá lugar unha Feira de Empresas da comarca cun rasgo innovador, presentada pola Coach e psicóloga social Susana Rodríguez, aberta a todo o público entre as 10:00h e as 14:00h na Casa dos Alonsos. Tamén realizarase unha Charla sobre «Nova perspectiva nos Recursos Humanos, unha mirada sensible na era tecnolóxica» a cargo de María Caeiro, Conselleira delegada do Grupo Caeiro, que porá o broche final a esta edición de «Tecnoimaxín».