A Guarda inicia o 10 de setembro as obras de urbanización da Subida a San Amaro en Camposancos

O vindeiro luns día 10 de setembro iniciaranse as obras de urbanización e mellora de servizos da Subida a San Amaro en Camposancos, a execución destas obras realizarase, na medida do posible, en convivencia co uso desta rúa por parte dos veciños, ao tratarse dunha rúa moi transitada.

Esta Rúa que conecta a estrada de Circunvalación coa Igrexa da Visitación, contará con dobre sentido de circulación, delimitación dos espazos peonís, zonas de aparcamento, xardíns e a previsión para instalación dos contedores de residuos. O proxecto contempla a renovación da rede de abastecemento de augas, así coma a dotación de bocas de incendios e substitución da rede de saneamento, separando as augas pluviais e fecais.

A rúa contará cunhas beirarrúas de enlousado de granito, unha pavimentación de lastros de granito rexuntados con morteiro e unha lousa de granito central acabado abuxardado.

Estímase que o prazo de execución das obras, que contan cunha inversión total de 160.216,68 € IVE incluído con cargo ao Plan Concello da Deputación de Pontevedra, non se demore máis de 60 días dende o inicio das obras.