A Guarda organiza un campamento de Nadal para facilitar a conciliación en festas

Conciliaguarda no Nadal é a proposta de campamentos de conciliación para as próximas vacacións de Nadal. O Concello da Guarda organiza este campamentos cheo de actividades lúdicas para as crianzas e así facilitar a conciliación da vida persoal e laboral.

Os obradoiro terán lugar os días 23, 24, 26, 27, 30 e 31 de decembro e 2 e 3 de xaneiro en horario de 9 a 14 horas. Cabe a posibilidade de aumentar o horario de 8:30 a 14:30 horas para aquelas familias que o precisen.

Ofértanse un total de 30 prazas para a rapazada empadroada na Guarda con idades entre os 3 e os 10 anos (é dicir, escolarizadas desde 4º de Educación Infantil).

Para inscribirse pódese acudir presencialmente no Rexistro do Concello coa ficha de inscrición cuberta, ou na sede electrónica cubrindo unha instancia xeral xunto coa ficha de inscrición que se atopa na web do Concello. O prazo de inscrición comeza o próximo 20 de novembro e remata o 5 de decembro.

En caso de que o número de inscricións supere o número de prazas realizarase un sorteo público o 13 de decembro ás 10:00 horas no Concello da Guarda.

A listaxe de persoas admitidas será publicado na web do Concello e aparecerá codificado co número de rexistro da solicitude, polo que resulta importante conservar o comprobante da presentación da mesma.

Máis información en informacion@aguarda.es na OMIX do Concello da Guarda.

Ficha Inscrición Campamento Nadal