A Guarda organiza unha nova saída ao teatro en Santiago de Compostela

O vindeiro xoves 3 de abril, ás 18:00 horas, os veciños e veciñas da Guarda están convidadas novamente a asistir ao teatro en Santiago de Compostela. Desta volta os asistentes desfrutarán da obra “A Burra, a Mesa e o pau”.

Esta obra dirixida por Lorena Conde fala sobre o traballo fabril que nos anos 90 invadiu os fogares contado a través dunha familia de clase obreira. Para iso, válese dun ton de farsa e comedia, pensado para un público maior de 12 anos.As obreiras, nais das futuras obreiras, tenden o pan con chocolate e énchense de dicirlles “hai que traballar para vivir” e tamén “isto era un rei que tiña tres princesas, pechounas en tres artesas e botounas ao mar. Vólvocho contar?.

Pero que sucede cando o traballo invade a mesa da cociña e a vida doméstica coma un gramón de raíz ávida e a mesiña dos manxares rompe e a burra escapa axitando as orellotas e hai que andar atraéndoa con astucias e cenorias? Outro conto terá que comezar…

Pois este é o conto de fadas dunha familia obreira galega naqueles tempos nos que era máis doado crerlles os contos ás avoas que as promesas aos patróns.

Para acudir a esta cita teatral, un bus sairá ás 15:00 da Rúa Rosalía de Castro (Centro Cultural), con previa inscrición no seguinte formulario: https://docs.google.com/forms/d/e/1FAIpQLSdTfTN1a9FDKQEj7uQzlwAPoWIcMlg1qaD__cejoShSw7B5kQ/viewform (terán prioridade aquelas persoas que NON desfrutaran do programa anteriormente). A actividade ten un custe total de 5€ por persoa.