A Guarda prepárase para recibir este domingo á tripulación do volanteiro “O Piueiro”

O Concello da Guarda fai un chamamento á cidadanía para acudir á recepción da tripulación do volanteiro “O Piueiro” que chegará ao Porto da Guarda este vindeiro domingo día 5 de xuño entorno ás 16:30h da tarde.

A Asociación Piueiro realizou unha travesía coa súa embarcación tradicional ata o Festival Marítimo Passaia Itsas Festivala 2022 no País Vasco, unha singladura na que levou o nome da Guarda e fixeron de excelentes embaixadores da nosa vila nos diferentes portos nos que arribaron.

A travesía arrancaba na mañá do pasado 9 de maio, partindo a tripulación coa embarcación do Piueiro dende o Porto da Guarda, unha singladura excepcional que os levou por augas galegas e do cantábrico recalando en Fisterra, Malpica, Cariño, Luarca, Xixón, Comillas, Castro Urdiales, Getaría e Passsaia, porto ao que chegaron o 26 de maio para participar no Festival Marítimo Passaia Itsas Festivala 2022.

Unha travesía na que non faltaron os imprevistos, cunha avaría no motor que obrigou á embarcación a permanecer amarrada no Porto de Malpica, pero que grazas ao bo traballo do equipo de mecánicos e aos colaboradores desta singladura, se poido solucionar e continuar co seu traxecto ata augas do País Vasco.

Unha vez rematada a súa participación no Festival Marítimo Passaia Itsas Festivala 2022 o pasado domingo día 29 de maio, o Piueiro izou a súa vela novamente para dirixirse ao seu porto base, o Porto da Guarda, onde está prevista a súa chegada este domingo 5 de xuño ás 16:30h da tarde e onde serán recibidos polas autoridades locais e veciños e vistantes da nosa vila.