A Guarda proxecta de balde películas finalistas dos Mestre Mateo

• O ciclo arranca o xoves 22 coa película “Honeymoon” e contará co coloquio do seu director, Enrique Otero

Durante tres semanas desfrutaremos de cine “feito en Galicia” no Centro Cultural da Guarda, cunha escolma de gran calidade, pois estas obras contan con varios nomeamentos nos Premios Mestre Mateo.

“É unha oportunidade para desfrutar de cine de calidade, pois conta co respaldo dos Mestre Mateo, e sen recorrer a plataformas de pago ou a longos traxectos ata as salas de cine”, sinala o alcalde da Guarda.

A idea do presente ciclo é amosar unha escolma dos títulos mais recentes no audiovisual galego, un sector en auxe, que cada vez defende maiores propostas de calidade e abrindo as súas producións a temáticas do mais diversas.

O ciclo comezará o xoves 22 de maio ás 20:30h., coa película “Honeymoon”, un thriller protagonizado por Nathalie Poza e Javier Gutiérrez, matrimonio en destrución, a quen xa non lles une nada, ata que unha circunstancia inesperada lles leva a emprender unha viaxe, tanto a nivel xeográfica e emocional, co fin de conseguir os cartos para remediar unha situación que lles cambiou a vida.

A segunda entrega do ciclo será o venres 30 de maio, co documental “Filmei paxaros voando”, que ademais do premio Mestre Mateo a Mellor documental, recibiu no 2024 a mención especial do xurado en L’Alternativa Festival 2024 de Barcelona, onde foi estreado. O documental conta unha historia de regreso ao fogar (Galicia), tras vinte anos de vida na cidade (Barcelona). É unha historia de reconexión familiar, de reconciliación coa figura materna, pero tamén de descubrimento, onde se mestura a recuperación da memoria familiar coa da memoria histórica dos anos 70-80.

Por último, o ciclo pecharase coa longametraxe “As Neves” o venres 6 de xuño. Un filme revelación o pasado 2024 pola temática xuvenil abordada: a noite de Entroido un grupo de adolescentes celebran unha festa e se drogan con cogomelos por primeira vez. Ao día seguinte espertan cun temporal de neve e a nova de que Paula, unha das rapazas da festa, desapareceu. Mentres, a vila queda incomunicada e cae Internet. Cada vez é mais urxente atopala. Iníciase unha investigación que causará un profundo cambio nas súas vidas e na súa relación co mundo.

Todas as películas proxectaranse no Salón de Actos do Centro Cultural en horario de 20:30h., en versión orixinal.

Esta programación conta co financiamento do Plan +Provincia da Deputación de Pontevedra