Aberto o prazo para participar no Certame de Microrrelatos 2018 da Biblioteca Municipal

A Biblioteca Pública Municipal da Guarda ven de abrir o prazo para participar no Certame de Microrrelatos 2018. O concurso busca fomentar a lectura, o talento e a creación literaria entre as persoas adultas e os máis mozos do municipio.

Todas aquelas persoas que desexen aportar a súa breve narración, poderán facelo ata o vindeiro 17 de abril entregando unha copia impresa no departamento de Cultura do Concello da Guarda (entre as 9 e as 14 h de luns a venres) ou no Centro Cultural (de 10 a 13 h e de 17 a 20 h de luns a venres e de 10 a 13 h os sábados).

Todos os participantes recibirán un agasallo e verán expostos os seus traballos a partir do 20 de abril.

A convocatoria está aberta á participación de persoas de tódalas idades e a temática será libre, namentres os textos deberán cumprir os seguintes requisitos: deben estar escritos en lingua galega, non debe superar as 150 palabras (sen incluír o título) e deben ser orixinais e inéditos.

O 20 de abril farase entrega dun agasallo a todos os participantes neste Certame de Microrrelatos 2018 na Biblioteca Municipal ás 18 horas. Deseguido, procederase a expor todos os traballos recibidos no Centro Cultural.

O Certame de Microrrelatos é unha iniciativa da Concellería de Cultural do Concello da Guarda coa que se conmemora o Día Internacional do Libro (23 de abril) e o Día Internacional do Libro Infantil e Xuvenil (2 de abril).