A exposición fotográfica «Falan de min, falan de ti» chega este venres ao Centro Cultural

O fotógrafo Alberto Pereiro Lueiro inaugurará a mostra este venres ás 19:30 h. As súas fotografías buscan rachar cos prexuízos sobre as persoas que traballan na rúa.

O Centro Cultural acollerá dende o vindeiro venres, 6 de abril, a exposición fotográfica «Falan de min, falan de ti», o primeiro traballo público do fotógrafo porriñés Aberto Pereiro Lueiro, máis coñecido como «Holly». A mostra, composta por 17 fotografías protagonizadas por Pepe Kórdoba (“Niño”), reivindica o respecto a todas aquelas persoas que traballan na rúa, convidando aos espectadores a formar parte das súas sensibilidades e sentimentos.

Nesta liña, segundo apunta o autor, a reportaxe fotográfica-documental chama á reflexión e a «afondar nos xeitos que temos de ver todo o que nos parece distinto á nosa forma de vida»; e a ter, en definitiva, «unha visión aberta e construtiva onde a nosa mirada non sexa incriminatoria e marxinal por costume». Durante o seu percorrido pola exposición, os e as visitantes serán as encargadas de descubrir cada unha das fotografías, que permanecerán tapadas tras un veo simbólico.

Inauguración co autor

A exposición inaugurarase oficialmente este venres, 6 de abril, ás 19:30 horas no Centro Cultural. As persoas que asistan á presentación poderán coñecer da man do propio Alberto Pereiro Lueiro a mensaxe das súas fotografías, amais de visualizar unha peza audiovisual coa que se achegarán á vida cotiá do seu protagonista.

«Falan de min, falan de ti» poderá visitarse ata o 24 de abril no Centro Cultural, en horario de 10:00 a 13:00 e de 17:00 a 20:00 horas de luns a venres. Os sábados poderá contemplarse entre as 10 e as 13 horas.