Ampla programación de actividades para esta fin de semana na Guarda
A Guarda preparase para unha fin de semana chea de actividades para todos os gustos e todas as idades cunha ampla programación cultural e festiva.
Programación para o Venres 22 de Xuño
O Centro Cultural da Guarda acolle ás 20:00h da tarde a obra de teatro “O Anel Máxico”, obra escrita por Cándido Pazó, posta en escena polo Grupo de Teatro da Sangriña.
Destaca tamén nesta xornada o concerto de Liquen, integrado no programa musical “Música nas Prazas” ás 22:00h na Praza de Salcidos.
Ás 22:30h realizarase a primeira actividade da III Festa Castrexa, que consistirá nunha queimada popular na Rúa Cervantes(A Botica).
Programación para o Sábado 23 de Xuño
Ás 12:00h a Biblioteca Municipal da Guarda acolle unha nova edición de Contos Contados con teatro musical, maxia e circo con Payaso Piruleta.
A III Festa Castrexa congregará un bo número de actividades nesta xornada, ás 11:00h a Alameda da Guarda acollerá un obradoiro de espadas da man de AGUDE e ás 16:30h realizaranse dous obradoiros de espadas e cabaliños, no Auditorio de San Bieito e na Rúa Cervantes(A Botica) respectivamente. A partires das 21:00h a actividade céntrase no recinto do antigo Estadio do Tecla con oferta gastronómica e actuacións do Grupo Folk Na Revolta ás 21:30h e festival do Grupo Abobriga ás 00:00h. Ás 23:00h acenderase unha gran fogueira
As tradicionais fogueiras de San Xoán congregarán pola noite a un bo número de veciños e visitantes en diferentes espazos do municipio, lume e meigas nunha noite especial ao carón das fogueiras.
O Centro Social O Fuscalho organiza tamén o Solsticio de verán ás 23:00h ao carón da Atalaia do Porto de A Guarda, que contará coas actuacións de Os Carballas e Zurrumalla, cunha foliada popular coma remate.
Programación para o Domingo 24 de Xuño
O domingo 22 de xullo a Asociación “Os Amigos” de Camposancos organiza o XIV Encontro de Palilleiras que congregará a máis dun centenar de persoas no Casino, un evento xa consolidado tal que como afirmou a súa organizadora Loli Portela, no que tamén se realizan sorteos e regalos de produtos para os asistentes. A inauguración oficial será ás 12:00h, e o evento realizarase entre as 10:00h e as 19:00h.
Na programación da III Festa Castrexa a partires das 11:00h o campo de fútbol de Chans no Monte Santa Trega será escenario de diferentes actividades coma unha mostra de artesanía e unha andaina guiada por Miguel Reboredo. Ás 12:30h realizarase a lectura do pregón a cargo de Francisco Álvarez(Koki) e xantar con música e actuacións de baile a cargo de grupos da Guarda. Ás 15:30h terá lugar unha exhibición de escultura e talla de madeira con motoserra e xogos populares para nenos e maiores. Para por o broche final a esta terceira edición ás 19:00h actuación de grupos de baile da localidade.
