Baloncesto, fútbol e unha carreira popular: A Guarda celebra o Nadal tamén con deporte
Para despedir o ano, celebrarase na Piscina Municipal o «Chapuzón Navideño», unha actividade con inchable acuático na que poderán participar pequenos e maiores.
A Guarda acollerá durante este Nadal unha serie de actividades deportivas para todos os públicos, dando comezo este mesmo domingo coa celebración da tradicional carreira San Silvestre no Porto guardés.
A proba, organizada pola Sociedade Atlética do Trega en colaboración co Concello da Guarda, comezará a partir das 10:30 horas e contará con 9 categorías (de cativos dende 3 anos a veteranos/as). A distancia do percorrido dependerá da categoría á que se pertenza, sendo de 10 km para as categorías sénior e veteranos. As inscricións permanecerán abertas ata as 23:59 horas desta noite e poderán realizarse a través do correo electrónico trega@trega.es.
Para despedir o ano, o Concello organiza o próximo sábado 30 de decembro un «Chapuzón Navideño», ao que poderán sumarse os pequenos e pequenas da casa e as súas familias. A actividade será no interior da Piscina Municipal, onde contaremos cun gran inchable acuático entre as 11:30 e as 13:00 horas. Non precisa de inscrición previa e a entrada será de balde.
O mesmo sábado, disputarase no campo de fútbol da Sangriña o I Torneo de Nadal Concello da Guarda, organizado polo Sporting Guardés. O campeonato contará, a partir das 9:30 horas, coa participación de 14 equipos das comarcas do Baixo Miño e Val Miñor, así como de Vigo e Ourense, das categorías alevín e benxamín.
O programa deportivo destas festas rematará o día 7 de xaneiro co VII Torneo de Nadal Baloncesto 3×3 Vila da Guarda, organizado polo Club Baixo Miño Bascket en colaboración co Concello da Guarda. Os partidos comezarán ás 10:00 horas no pavillón do IES da Sangriña, disputándose durante a mañá a primeira fase para, durante a tarde, celebrarse as semifinais e a final. Os equipos deberán estar formados por entre 3 e 5 persoas maiores de 16 anos e se admitirá un máximo de 10 grupos. As persoas interesadas en participar poderán consultar as condicións e inscribirse ata o 30 de decembro ás 12:30 horas na páxina web https://www.formfy.com/form/8576507.
