O Certame de Microrrelatos 2018 amplía o prazo para a presentación de traballos ata o 19 de abril

O Certame de Microrrelatos 2018, organizado pola Biblioteca Pública Municipal da Guarda, amplía o período de presentación de traballos ata este xoves, 19 de abril. As persoas que desexen participar poderán entregar unha copia impresa do seu microrrelato no departamento de Cultura do Concello da Guarda (entre as 9 e as 14 h) ou no Centro Cultural (de 10 a 13 h e de 17 a 20 h).

A convocatoria está aberta á participación de persoas de tódalas idades e a temática será libre, namentres os textos deberán cumprir os seguintes requisitos: deben estar escritos en lingua galega, non debe superar as 150 palabras (sen incluír o título) e deben ser orixinais e inéditos.

O 20 de abril ás 18 h farase entrega dun agasallo a todos os participantes na Biblioteca Municipal. Deseguido, procederase a expor todos os traballos recibidos no Centro Cultural.

O Certame de Microrrelatos é unha iniciativa da Concellería de Cultural do Concello da Guarda coa que se conmemora o Día Internacional do Libro (23 de abril) e o Día Internacional do Libro Infantil e Xuvenil (2 de abril).