Charlas ao alumnado guardés para coñecer sobre a prevención de incendios
O Concello da Guarda levou durante esta semana a campaña “Escudo frondoso” aos colexios da vila. Esta campaña busca protexer os bosques e o medio ambiente, implicando a todas as xeracións.
O CEIP As Solanas, colexio San Xerome, CEIP A Sangriña, colexio Padres Somascos, colexio San José e o CEIP Manuel Rodríguez Sinde recibiron charlas sobre a prevención de incendios e sobre as árbores frondosas e autóctonas. Deste xeito, descubriron como eles tamén poden axudar, xa que a protección do medio ambiente é un deber de todos e todas.
Tamén recibiron a visita do GES da Guarda que lles amosou ao estudantado como traballan ante este tipo de emerxencias naturais.
Ademais as visitas aproveitáronse para recoller as árbores que os pequenos coidaron desde o Magosto e que se sumarán ás máis de 800 árbores que o Concello vai repartir entre os propietarios das parcelas da faixa de prevención de incendios.
Recordamos que aqueles propietarios que queiran solicitar árbores poden facelo a través da sede electrónica ou do rexistro do Concello, antes do 31 de xaneiro, indicando a súa parcela e adxuntando unha fotografía do último ano da mesma.
