O Concello promove un obradoiro de decoración de Nadal para o comercio e o público en xeral

O Concello da Guarda promove dende hai dous anos a campaña «Decora o teu Nadal», unha iniciativa coa que se anima aos establecementos comerciais, asociacións de veciños e público en xeral a elaborar un adorno común, de xeito que este aporte unha sinal de identidade propia do Nadal na nosa vila.

Este ano, a proposta elaborada pola interiorista e voluntaria nesta iniciativa, Maite Lomba, é un abeto de Nadal para cuxa elaboración precisaremos de materiais de baixo custo e/ou de refugallo. O obradoiro terá lugar na Casa dos Alonso o próximo mércores 22 de novembro, de 15 a 18 horas, e o sábado 25 de novembro, entre as 16 as 19 horas.

Cada unha das persoas participantes deberá levar o seu propio material para a elaboración do elemento decorativo, seguindo as pautas marcadas por Maite Lomba no vídeo titorial que poden visualizar na canle de YouTube do Concello da Guarda, nas páxinas de Facebook do Concello da Guarda e Cultura A Guarda, ou a través deste enlace.

O material e as ferramentas necesarias para a elaboración do abeto de maior tamaño, a modo de referencia, son: arame de enreixado (un máximo de 5 metros), rede de coelleira (1,2 x 1 metros, máximo), guata (1,2 x 1 metros), un pau que serva a modo de mastro (1 metro de longo, aproximadamente), luces de Nadal (ao gusto), un maceteiro (preferiblemente de barro), materiais útiles para atar (tales como bridas ou arame fino e maleable),  unhas tesoiras, uns alicates de corte, arames ‘de corona’ (media ducia, aproximadamente) e esponxas de suxeición (cantidade variable en función do tamaño do maceteiro empregado e preferiblemente de uso en seco).  O decorado da árbore será ao gusto. É aconsellable, ademáis, levar unhas luvas de traballo.

Aquelas persoas que non podan paticipar no taller e desexen realizar o adorno pola súa conta, poderán ulilizar o molde de madeira, necesario para elaborar a forma do elemento decorativo, na Casa do Concello e seguir o procedemento indicado por Lomba no titorial.

A campaña «Decora o teu Nadal» inclúe toda unha serie de actividades dirixidas á decoración urbana por parte das asociacións e o comercio, así como obradoiros para a decoración de espazos públicos por parte das nenas e nenos da vila.