Éxito de participación na Xornada Micolóxica
O sábado, 7 de novembro, a Asociación Forestal e de Educación Ambiental “A Jalleira” en colaboración co Concello da Guarda, organizou unha Xornada Micolóxica para os veciños e veciñas da localidade.
A convocatoria foi un éxito xa que se cubriron todas as prazas dispoñibles para participar nesta iniciativa que se desenvolveu tanto pola mañá coma pola tarde.
De 10 a 12 horas tivo lugar a parte expositiva na Casa dos Alonsos. Nesta clase teórica membros de “A Jalleira” falaron sobre a gran variedade de especies de setas e informaron aos presentes sobre as diferentes guías. Ademais de maneira práctica mostraron diferentes tipos de setas para que os veciños e veciñas guardeses puideran diferencialos.
Pola tarde, en horario de 16 a 18 horas, os participantes, xunto aos monitores, trasladáronse ao monte Torroso para buscar setas. A boa climatoloxía fixo que, divididos en dous grupos, atoparan moreas de setas moi diferentes e incluso, algunha delas, pouco común.
En ambas actividades os asistentes mostráronse moi participativos e encantados pola iniciativa. Tanto a organización coma os participantes quedaron con ganas de repetir esta experiencia.