Formación dixital de xeito divertido para a adolescencia da Guarda
Nestes días sen colexio, 15 rapaces e rapazas da Guarda participaron no Campamento Dixital que se desenvolveu na aula CEMIT.
Os participantes, de 9 a 13 anos, aprenderon as ferramentas necesarias para desenvolverse no entorno dixital. Neste eido, o alcalde recalcaba que “moitas das cousas que aprendestes estes días, vanvos servir para os vosos estudos”.
Os alumnos e alumnas aprenderon sobre programas que “serán básicos para a súa formación de agora en adiante”, como destacaba Malena, a monitora do Campamento Dixital. Deste xeito, durante estes días aprenderon como buscar información de valor na Internet, navegar con seguridade e facer posibles as súas ideas co uso adecuado da tecnoloxía.
Con esta iniciativa búscase a formación tecnolóxica e dixital que en ocasións a rapazada non pode ter pola brecha dixital ou pola becha xeracional.
Para rematar a actividade, esta mañá, entregáronselle uns diplomas polo aproveitamento deste Campamento, cuxas leccións serviranlles para un uso mellor e seguro das tecnoloxías.
Trátase dunha iniciativa impulsada pola Fundación Cibervoluntarios dentro do Programa de Competencias Dixitais para a Infancia (CODI) en colaboración co Ministerio de Xuventude e Infancia e o financiamento dos fondos Next Generation da Unión Europea.
