A Guarda celebrará a súa primeira Feira de Emprego e Formación os días 5, 6 e 7 de outubro

A Guarda acollerá a súa primeira Feira de Emprego e Formación “Imaxinactívate” os próximos días 5, 6 e 7 de outubro na Casa dos Alonso, cun amplo programa de obradoiros, charlas e mostras orientados ao emprendemento e á mellor empregabilidade das persoas con ideas de novos negocios ou en busca dunha nova filosofía de traballo.

O acto de presentación das xornadas celebrouse esta mañá coas intervencións do alcalde do Concello da Guarda, Antonio Lomba, o concelleiro de Formación e Emprego, Javier Crespo, a técnica de Xuventude, Patricia Cuña, e a formadora e psicóloga social, Susana Rodríguez.

Inspiración e motivación

Segundo explicou o rexedor local, a feira contará con diferentes actividades dirixidas principalmente a persoas con perfil emprendedor ou en busca de emprego, que poderán inscribirse nos distintos obradoiros ou participar nas charlas abertas. Así mesmo, os asistentes terán a oportunidade de coñecer modelos de negocio existentes na Guarda durante a xornada do sábado, cando se celebrará a “Feira de empresas locais: novas ou con trazo distintivo”, entre as que se atoparán firmas de arquitectura, enxeñería ou economía social. “Isto é moi interesante, porque ofrece unha fotografía da situación do emprendemento na nosa vila e poden animar e dar exemplo”, asegurou Antonio Lomba.

Javier Crespo, pola súa parte, quixo salientar a variada e completa programación coa que conta o evento, con especial referencia á inclusión da temática sobre as novas formas de traballo colaborativo e a cuestión do financiamento, esencial para o inicio de todo novo proxecto. Esta feira nace, segundo explicou o concelleiro, coa intención de converterse na primeira dunha serie de eventos anuais que “permitan continuar traballando nesta liña, dando a coñecer as empresas da localidade e fomentando a formación e o emprego”.

A Guarda recibirá a relatores “de primeiro nivel que acoden motivados pola importancia destas xornadas”, asegurou Susana Rodríguez, especialista en desenvolvemento persoal e relatora nesta primeira edición da feira. “Animo a todas as persoas que teñan ilusión a que se enganchen, que investiguen sobre os profesionais que imparten as charlas e talleres e convenceranse de de que vale a pena acudir”, sentenciou a formadora.

Non só se dirixe a persoas con intención emprendedora, senón a “todas aquelas que desexen adquirir novos coñecementos e perspectivas laborais”, segundo expuxo a técnica de Xuventude do Concello guardés.

Programación do evento

O acto inaugural desta primeira edición da feira será ás 18:30 horas do xoves 5 de outubro, se ben xa durante a mañá e primeira hora da tarde se impartirán os primeiros obradoiros. Así, a consultora de recursos humanos Sonia Fernández estreará as xornadas co taller “Financiamento para emprender. Público e privado”, entre as 10 e as 14 horas do xoves, no que contará coa intervención do Grupo de Desenvolvemento Rural, GDR14.

A xornada continuará pola tarde co taller sobre “Coaching e xestión emocional” ofertado por Susana Rodríguez entre as 16 e as 18 horas e, xa ás 18:30 horas, se celebrará o acto inaugural. A actriz e contacontos Bea Campos será a encargada de achegar ao público, cun toque humorístico, a esencia destas xornadas e, de seguido, a coach Raquel Pedrouso ofertará o seu obradoiro sobre “Coworking e formas de traballo colaborativo”.

A aproximación ao marketing dixital virá durante a mañá do venres da man do formador e asesor José Fonterosa, cuxo obradoiro terá un horario de 10 a 14 horas. O taller “Coaching e emprego”, ás 16 horas do sábado, será unha continuación do xa ofertado pola psicóloga social Susana Rodríguez na tarde do xoves, e a ela seguiraa unha charla sobre emprendemento feminino protagonizado por Eva Carreira, emprendedora artesá a través da súa empresa “Zoclos, zuecos de Galicia”, a partir das 18:30.

Preto das 19:15 horas tomará o testemuño o comunicador, consultor e docente Roberto Pérez, coa súa charla sobre “motivación par a creacións de start ups”, namentres o sábado, derradeiro día da feira, poderedes participar na charla motivacional titulada “Contigo hai futuro” dirixida por Pablo G. Fortes, especialista en xestión e desenvolvemento de habilidades. Tamén o sábado será posible visitar unha pequena mostra do tecido empresarial guardés, con expositores e a celebración dunha mesa redonda na que presentarán os seus distintos modelos de negocio.

Para acudir aos obradoiros é necesario inscribirse previamente no formulario dispoñible na páxina web www.imaxinactivate.com, acudindo á Oficina Municipal de Información Xuvenil (OMIX), no teléfono 986 61 45 46 ou enviando un correo electrónico á dirección informacion@aguarda.es. As charlas e a mesa redonda das empresas locais, pola súa parte, serán de acceso libre.