A 15K do Atlántico pecha mañá o prazo de inscrición na carreira e a andaina entre Oia e A Guarda

A quinta edición da proba 15K do Atlántico pechará o seu período de inscrición mañá mércores, con máis de 700 persoas anotadas ata o de agora. O evento deportivo celebrarase este domingo, cun percorrido de 15 km paralelo á costa sur da provincia pontevedresa, entre as localidades de Oia e A Guarda, pasando polo Rosal.

A proba tamén contará cunha andaina popular na que os participantes poderán facer un percorrido de 12 km. A saída da carreira será ás 11:00 horas dende o campo de fútbol de Oia, namentres a andaina partirá ás 10:00 horas, con chegada ao porto marítimo da Guarda.

O período de inscricións permanecerá aberto ata as 23:59 horas de mañá e poderá realizarse a través da páxina web www.championchipnorte.com ou de forma presencial nos centro Do-Majó (A Guarda) e Excálibur (O Rosal). O prezo é de 4 euros por persoa para a realización da andaina e de 14 euros por persoa para sumarse á carreira.

Para facilitar a chegada e a volta ao punto de partida antes e despois da proba, a organización porá a disposición dos participantes un autobús entre Oia e A Guarda.