Inauguración da exposición “Casas de luz”, mostra de grabados de Mariano Castillo sobre os faros galegos
A sala de exposicións do Centro Cultural da Guarda acollerá do día 1 ao 17 de xullo a mostra de grabados “Casas da luz” realizada polo ilustrador e grabador zaragozano Mariano Castillo, sobre os máis representativos e fermosos faros de Galicia.
A sala de exposicións do Centro Cultural da Guarda acollerá do día 1 ao 17 de xullo a mostra de grabados “Casas da luz” realizada polo ilustrador e grabador zaragozano Mariano Castillo, sobre os máis representativos e fermosos faros de Galicia.
A exposición será inaugurada este venres día 1 de xuño e chega á Guarda tras ser mostrada en Zaragoza e en diversos puntos da xeografía galega como A Coruña e Padrón. Ofrece o último traballo dun grabador recoñecido a nivel internacional que leva realizando exposicións das súas obras dende fai tres décadas.
Nesta ocasión o artista aragonés presenta unha obra feita ao aguaforte e barniz despois dun extenso traballo de campo que levou a cabo no verán de 2015. Durante eses meses realizou un lento percorrido pola costa galega, facendo esbozos e fotografías mentres se relacionaba coas xentes dos lugares, o que lle permitiu enriquecer a súa obra e chegar a coñecer máis sobre o traballo dos fareiros.
O resultado de todo este traballo é unha fermosa e completa exposición, á que se convida a asistir a todo o que o desexe. Nela poderán desfrutar dunha mostra de emblemáticos faros galegos como a Torre de Hércules, o faro de Fisterra, os sobrecolledores faros de Estaca de Bares e Cabo Vilán ou das illas de Cíes e Sálvora, entre outras moitas xoias.