As nenas e nenos do campamento urbano amosan ó alcalde as súas destrezas artísticas e científicas
Os rapaces e rapazas participantes no campamento urbano de verán recibiron este luns ó alcalde do Concello da Guarda, Antonio Lomba, para mostrarlle as actividades que están a desenvolver durante as mañás deste mes de xullo no antigo Colexio do Sinde.
Os máis de 30 cativos, de entre 3 e 12 anos, amosaron ó rexedor as réplicas elaboradas por eles mesmos das grades obras de Vicent Van Gogh e Edvard Munch, entre outros; unha actividade enmarcada na semana dedicada á arte. Ademáis, aproveitaron para demostrar as destrezas adquiridas durante a semana anterior, na que os rapaces se mergullaron no mundo da ciencia. Así, ensinaron ó visitante un dos seus experimentos máis atractivos: un volcán que semellaba cuspir verdadeira lava.
Durante a próxima semana, as rapaza e rapaces disfrutarán duns días dedicados á práctica deportiva, para rematar a súa experiencia no campamento na derradeira semana de xullo cun percorrido pola vila, con visita a museos e outros puntos de interese cultural, dentro do bloque temático titulado “Coñece o teu pobo”.
