O ALCALDE GUARDÉS, ANTONIO LOMBA, REÚNESE CO ALCALDE DE VIGO, ABEL CABALLERO PARA FALAR DA POSIBLE INTEGRACIÓN DA GUARDA NA ÁREA METROPOLITANA
O alcalde da Guarda, Antonio Lomba, reuniuse hoxe co alcalde de Vigo, Abel Cabellero, para falar da posible integración da vila da Guarda na Área Metropolitana.
Neste encontro, que o alcalde guardés tildou de “moi cordial”, Lomba plantexoulle ó alcalde de Vigo os problemas que a súa vila tería para pertencer a esta agrupación de Concellos.
Así, Lomba afirmou que para a Guarda, Vigo é a cidade de referencia, tanto da sanidade, coma para estudantes e o lugar onde moitos guardeses teñen os seus postos de traballo. Por esta razón o alcalde afirmou que sería conveniente formar parte desta Área Metropolitana mais antes deberían resolverse os problemas de comunicación.
“A comunicación que temos con Vigo non é boa. O que non pode ser é que A Guarda forme parte da Área Metropolitana pero que estea illada”, declarou Lomba. E continuou: “Para integrarse o que precisamos é que se remate a vía de alta capacidade que terminaría de unir A Guarda con Tui”.
Neste punto, o alcalde guardés afirmou que aínda que no proxecto inicial da Xunta esta estrada xa debería de estar rematada, na actualidade descoñecen cal é o seu estado. “É unha obra fundamental, polo que precisamos que a Xunta nos informe”, dixo.
Sobre este tema, Antonio Lomba afirmou que o alcalde de Vigo mostrou o seu apoio. “A pesar de que non é competencia da Área Metropolitana exisir esta vía de Alta Capacidade é importante ter o apoio de Caballero”, declarou Lomba.
Ademais, o alcalde guardés, tras a reunión afirmou que Abel Caballero comprometeuse a mellorar os puntos débiles dos Concellos que formen parte desta Área Metropolitana, e este era un deles.
Desta maneira, Antonio Lomba, dixo que o proxecto da Área Metropolitana, solventando esta cuestión, encaixaría coas pretensións da súa vila.
Paradas de autobús
O alcalde da Guarda, Antonio Lomba, aproveitou este encontro con Abel Caballero para trasladarlle outra petición. Así, solicitou novas paradas de autobús na zona do hospital de Povisa para os transportes públicos que chegan dende A Guarda por Baiona.
Neste punto Caballero afirmou que non habería “ningún problema”.
Este encontro terminou coa invitación por parte de Antonio Lomba ó alcalde vigués para visitar A Guarda e, se fora posible, presentarlle ó Presidente da Cámara Municipal de Caminha, Miguel Alves. Abel Caballero aceptou con moito gusto o encontro.
