O alumnado do Obradoiro de emprego da Guarda realiza prácticas e visitas formativas en colaboración con varias entidades e empresas da zona

• As actividades que está tendo a oportunidade de realizar o alumnado deste Obradoiro están sendo moitas e moi variadas. O obxectivo é proporcionar experiencias de aprendizaxe significativas e achegar ao alumnado á realidade do mercado laboral.

O alumnado da especialidade de Promoción turística local e información ao visitante atópase na actualidade realizando prácticas na exposición “A túa esencia. A Guarda, pobo mariñeiro”, que organiza a Asociación Piueiro e na que teñen a oportunidade de ter contacto directo co público e mellorar as súas competencias profesionais neste eido. Esta especialidade tamén organizou prácticas en visitas guiadas nas que participaron centros como Avelaíña.

As alumnas da especialidade de Atención Sociosanitaria en Institucións desfrutaron de prácticas formativas na Residencia San Telmo de Tui e no servizo de Axuda no Fogar do Concello, así como de visitas formativas á Residencia Santa Tecla da Guarda, e teñen programada unha próxima visita á Asociación Vontade en Tomiño.

O día 21 de xullo terá lugar unha bonita actividade común na que precisamente participarán usuarios/as da Asociación Vontade e que consistirá nunha visita guiada polo noso tramo do Camiño de Santiago, organizada pola especialidade de Turismo e na que tamén prestará apoio o alumnado da especialidade de Sociosanitaria, unindo así as actividades das dúas ramas formativas.

Deste xeito este alumnado pode aproveitar os recursos cos que contamos na comarca para completar a súa formación práctica, achegarse á realidade do mercado de traballo e mellorar as súas competencias profesionais.

Este obradoiro está subvencionado pola Xunta de Galicia, a través da Consellería de Emprego e Igualdade.