O Concello da Guarda recibe á promesa galega do atletismo Álex Sierpes

O salón de Plenos do Concello da Guarda quedouse pequeno ante a cantidade de amigos, familiares e ex-compañeiros que quixeron acompañar a Álex Sierpes na recepción deste venres.

O concelleiro de Deportes, Celso Fariñas, abriu o acto poñendo en valor o gran nivel do deporte guardés, como demostra Álex Sierpes en atletismo. O alcalde da Guarda, Roberto Carrero, recordou o esforzo que hai tras os logros deste xove deportista, sobre todo, o apoio e esforzo dos seus pais, Patricia e Javi, que tamén exercen como os seus adestradores.

O propio Álex Sierpes mostrouse enormemente agradecido ao seu irmán maior Christian, que o definiu como “compañeiro de adestramentos e de vida”. Tamén agradeceu o apoio dos seus pais que “sempre están nas boas e nas malas”, e o das súas avoas e o seu avó, que tampouco se quixeron perder este acto.

Despois xunto aos seus pais, explicounos catro das súas medallas máis importantes, entre elas o recente campionato de España sub-18 nos 3000m. Mais tamén compartiu o subcampionato europeo de cross por clubes na categoría sub-20, que confesou que lle fixo “especial ilusión ao ser a primeira proba internacional”.

Finalmente, tanto os seus pais, como o seu irmán Christian, puxeron de manifesto o orgullosos que están do pequeno dos Sierpes e fixeron alusión ao exemplo de humildade e traballo que supón para os atletas da Sociedade Atlética do Trega.